Xa o di o refrán: 'En abril, augas mil', e este mércores non será unha excepción. As choivas serán xeneralizadas nas catro provincias, localmente fortes ou persistentes, de maneira que estarán acompañadas de tormentas no litoral occidental da Coruña e no de Pontevedra. Iso si, as precipitacións tenderán a remitir ao final do día, de maneira que os chuvascos, que serán frecuentes pola mañá, irán espaciándose no tempo co paso das horas e serán "de carácter máis illado e ocasional á tarde", segundo as previsións de Meteogalicia.
As temperaturas manteranse estables, con mínimas que, no extremo sueste, alcanzaranse ao final do día. En canto ao vento, volverá soprar con forza durante a mañá no litoral norte e en zonas altas da Mariña de Lugo.
