Para entrecot de boi á pedra: O Pozo

Javier García, do restaurante O Pozo

Aínda que sexa de noite e chova, como aquel sábado, sempre é un pracer achegarse a Meira para comer un entrecot ou un chuletón de boi á pedra no restaurante O Pozo de Meira. Ambas as suxestións encabezan a atractiva oferta carnívora deste local. O entrecot sérveno fileteado en láminas, preparadas polos comensais na propia mesa. Basta cunha rápido volta e volta, como corresponde á fina textura do manxar. A modo de aderezo pásase pola pedra un pequeno taco de graxa do propio animal para reforzar o sabor. O chuletón, pola contra, preséntase en toda a súa soberbia dimensión.

Para acompañar estas carnes é aconsellable escoller un viño potente, a poder ser de reserva, aínda que os caldos da Ribeira Sacra tamén casan ben.

O Pozo completa a súa oferta de carne á brasa cunha tenreira exquisita e un logrado churrasco. A clientela prefire o de tenreira ao de porco, segundo comenta Javier García, que se encarga da grella e rexenta o local co seu irmán José Ángel. O churrasco é unha das propostas habituais no menú do día deste acolledor restaurante, coas súas mesas de madeira, algunhas delas con bancos corridos, e a súa decoración rústica. No medio do comedor atópase o pozo que lle dá nome ao establecemento. Este é de verdade, non un mero elemento decorativo.

ENSALADA DE XAMÓN

Como entrante tiven ocasión de probar unhas apetitosas zamburiñas, aínda que a oferta amplíase tamén ás navallas, o polbo á feira e unha saborosa ensalada de xamón, con cebola e aceite. É un dos pratos orixinais do Pozo. Hai outro que teño ganas de probar e do que me falaron marabillas. Trátase do queixo italiano provolone á grella, que non só esperta curiosidade, senón que convence aos comensais.

Non faltan peixes na carta do Pozo. O bacallau á brasa, moi saboroso, é un dos fixos, algo consustancial a calquera parrillada que se prece. Á hora de elixir peixe fresco, os propietarios do negocio adoitan contar cun par de opcións de calidade, sempre dependendo do mercado. Esta semana mostrábanche unhas robalizas de seis e catro quilos, ideais para facer ao sal ou ás costas, que farían a boca auga ao máis sibarita. No verán traballan moito o bonito, un peixe que se adapta moi ben á grella, pero esixe boa man por parte do cociñeiro para que non quede seco.

A torta de queixo ao forno, ben fría ben con marmelada, son opcións recomendables á hora de elixir unha sobremesa. Neste apartado, o rico flan de café compite cunha orixinal torta de tres chocolates e coa torta da avoa, con chocolate e galleta.

A relación prezo calidade, xunto ás boas viandas, é unha razón máis que suficiente para acudir a comer ao Pozo e tamén para repetir.