O cociñeiro Pepe Solla e o músico Xoel López estrearon este luns en Galicia unha maridaxe moi especial na que recuperaron en directo sabores e cancións do pasado durante un 'gastroconcerto' sobre o escenario da Praia Club da Coruña.
Os dous artistas galegos compartiron táboas para fusionar a súa arte nunha experiencia organizada por Hijos de Rivera, coa que celebrou un Pequeno Gran Momento 1906 acompañado pola cervexa Premium 1906 Rede Vintage 'La Colorada', coñecida así polo seu capuchón vermello.
"Gastronomía e música funcionan á perfección entre Pepe e mais eu, hai unha harmonía especial", aseguraba Xoel López durante a presentación ante os medios de comunicación deste acto 'made in Galicia', que o luns reuniu a unhas trescentas persoas.
O músico interpretou sete temas, o último, Terra, xunto a Pepe Solla, tras o que ambos comezaron a preparar un tartar de vaca galega porque en Galicia "non facemos boi, facemos vaca".
Solombo de vaca, cogombro novo, ceboliña, alcaparras, piparras, a xema de tres ovos, mostaza violeta con pebida de uva, vinagre e sal, todo picado para tomar sobre unha tosta con pipas, por exemplo, é un dos pratos estrela desta maridaxe, na que tamén se puideron degustar tapas de verduras, guisantes con xamón, bocadillo de luras ou, de sobremesa, peras ao viño.
O equipo de cociña de Pepe Solla, con oito cociñeiros, encargouse de darlles forma a estes sabores, e o broche final puxérono de novo os dous artistas pero, neste caso, interpretando o tema Throw your arms around me, da banda australiana Hunters & Collectors.
López e Solla xa maridaron esta experiencia en Madrid, onde funcionou moi ben, porque se trata de recuperar "cancións do pasado que non se deben perder", como The Boxer, de Simon & Garfunkel, ou Canción del jinete, de Paco Ibáñez con letra de Lorca.
Música e cociña sobre un escenario para recuperar cousas, ou para non perdelas, como filosofía tamén en ambas as artes, asegura o cociñeiro Pepe Solla, que se considera o "máis moderno entre os clásicos" ou "o máis clásico dos modernos" porque lle gusta manter a tradición na gastronomía mentres esta evoluciona.
Pepe Solla "canta ben", di Xoel López, e este é un bo pinche ao que "lle gusta cociñar e comer", comenta o chef Estrela Michelín e tres soles Repsol.
"E é que -asegura- o mellor da cociña está fóra, o mellor é comer", un pracer que este luns puideron compartir os asistentes a este 'gastroconcerto' que amenizou a noite coruñesa.
