O portavoz parlamentario do PPdeG, Pedro Puy, pediu este martes respectar o "proceso de reflexión" do presidente da Xunta, Alberto Núñez Feijóo, sobre o seu futuro, á vez que rexeitou pronunciarse sobre a incidencia que a posible marcha do actual xefe do Executivo puidese ter no partido e no Goberno.
"Eu non xogo ás quinielas", resolveu Puy na rolda de prensa da Xunta de Portavoces ao ser preguntado sobre as posibilidades de que sexa el quen substitúa ao presidente da Xunta no caso de que Núñez Feijóo presentase a súa candidatura para liderar o Partido Popular no conxunto do Estado.
"Faime unha pregunta sobre un suposto e eu non vou entrar nisto porque non estamos aquí para iso", remarcou Puy que se mostrou contrario a facer "apostas de futuros incertos".
Nesta liña ademais, sinalou que ve necesario que se respecte a "etapa de reflexión persoal" que pediu o líder do PPdeG.
Con todo, asegurou que pronto se sairá "de dúbidas" e será posible "falar de certezas".
BALTAR, PARTIDARIO DE QUE HAXA VARIOS CANDIDATOS. O presidente da Deputación de Ourense e do PP provincial, Manuel Baltar, mostrouse este martes "partidario" de que haxa varios candidatos no próximo congreso nacional do partido para poder "comparar", polo que animou a que "todos aqueles que teñan aspiración" de presidir o Partido Popular presenten a súa candidatura, xa que dese modo o partido "sairá reforzado".
