Sabores de toda a vida no Muíño

Nancy Barcia, no comedor do Muíño. Foto: TEÓFILO DE PEDRO

Se hai algo que distingue ao restaurante O Muíño de Meira é a consonancia entre a decoración tradicional, que respecta a estrutura e os elementos do restaurado muíño onde se asenta, e eses saborosos pratos de cociña caseira que tan ben reflicten a cultura gastronómica galega. Esa sincronía vese reforzada polo carácter familiar do negocio. O equipo formado polas irmás Elena e Nancy Barcia, cociñeira e coordinadora de sala, e os parentes que traballan con elas garanten un trato agradable ao cliente. Incluso nas xornadas dominicais de feira na localidade, cando se acumula o traballo, a dilixencia e a amabilidade están garantidas.

A proposta culinaria do Muíño é sinxela e céntrase nos menús do día e de fin de semana, con prezos moi alcanzables. O diario, de luns a venres ao mediodía, costa 8,50 euros. Os sábados e domingos, a oferta aumenta a súa calidade, pero o custo é de dez euros polos catro primeiros e catro segundos a elixir.

Hai un par de domingos tiven a ocasión de probar os seus demandados callos, unha das especialidades da casa. Estaban deliciosos, consistentes, cun espesor ben logrado e sen abusar do picante. No Muíño teñen boa man con outros pratos de culler, como o caldo, a fabada ou as lentellas. Entre os entrantes non faltan tampouco a ensaladilla caseira ou un clásico tan socorrido como os entremeses.

Aínda que de segundo optei por unhas pequenas troitas fritas, coa pel ben tostada, outro dos pratos do local cun bo número de seguidores, sorprendeume que de segundo se ofrecese cocido, precedido loxicamente da sopa de cocido que ofrecían como primeiro. Este prato é habitual os venres e domingos. Pero a cousa non parou aí. As opcións do menú completábanse con abundantes e ben elaborados pratos de cordeiro ao forno e churrasco. A paella inclúese con frecuencia nesta contundente oferta.

As carnes á brasa son unha das referencias do local, que inclúe na súa carta uns saborosos entrecots de tenreira ao cabrales ou en salsa de améndoa.

SOBREMESAS CASEIRAS

O colofón perfecto da comida chegou coas sobremesas caseiras. As tortas de galleta, queixo e piña ou o flan de café contribúen a redondear o bo sabor de boca. A torta de galleta leva dúas capas dunha crema moi parecida á do flan, co chocolate por encima.

Comer no Muíño é unha experiencia reconfortante. Constitúe un plácido reencontro con eses entrantes de culler e eses pratos típicos do interior de Lugo que nos invitan a comer ata ‘a fartura', coma se celebrásemos o día da patroa. Neste muíño, situado nun parque a beiras do Miño, poderán deleitarse con calma nesas viandas que nos devolven o sabor da cociña de toda a vida, algo que se agradece nestes tempos marcados pola présa e o comido lixo.