A Confederación Española de Hoteis acordou no seu último pleno, tras valorar todas as propostas, que o próximo Congreso de Empresarios Hostaleiros, programado para 2010, celebrarase en Santiago, coincidindo co Ano Santo. De acordo co colectivo, Compostela reúne unhas infraestruturas perfectamente adecuadas para acoller o encontro.
Este congreso nacional de empresarios hostaleiros, que organiza a Confederación Española de Hoteis e Aloxamentos Turísticos (Cehat), organízase cada dous anos e é un dos encontros máis importantes do sector no país.
O seu principal obxectivo é fomentar o diálogo e ser punto de encontro para identificar as principais deficiencias e propor solucións aos cambios que transformaron o sector turístico no seu conxunto e o hostaleiro en particular.
A Cehat representa a todo o sector do aloxamento español, tanto hoteis independentes como cadeas hostaleiras e apartamentos turísticos. Conta con máis de 9.000 establecementos e 1.500.000 prazas, agrupadas en 64 asociacións de ámbito local, provincial autonómico en todo o territorio nacional.
