Pódese afirmar que un cóctel por onde primeiro entra é pola vista, de aí o meticuloso coidado que na presentación dos seus combinados ofreceron os mellores barmans de España, reunidos no Campionato Nacional de Coctelería, que acolleu o compostelán Hotel Os Abetos.
Aínda que o momento máis atractivo é cando a coctelera voa nas mans do camareiro, a medición dos ingredientes e dos ornamentos estéticos que acompañarán ao vaso cobran especial importancia na preparación do que pode ser o mellor combinado de España.
Ás 17.30 deste martes apareceron as primeiras copas encima da mesa da competición. A ela foron chegando os concursantes coas súas bandexas repletas dos ingredientes que escolleran para conseguir un sabor e unha presentación excepcionais, desde froitas como piñas ou kiwis ata pós de canela ou noz moscada.
Seis minutos, sete copas
Sete copas en seis minutos. Era o reto que debían superar os finalistas do concurso. Cada un deles dispuxo sobre a mesa os seus materiais e deu comezo á coreografía que terminaría coa creación dun dos mellores cócteles do Estado.
O primeiro ingrediente co que tiñan que enfrontarse era o xeo. A temperatura á que está a bebida inflúe no seu sabor, por iso algúns optaban por arrefriar durante uns minutos a copa cuns cubitos, outros os deixaban nela ou ben os introducían dentro da coctelera onde se mesturaban as bebidas.
Os diversos licores e zumes, en cantidades coidadosamente calculadas polo camareiro, pasaron finalmente da coctelera ás copas, intentando que todas elas quedasen á mesma altura. Tras este paso chegou o momento dos últimos detalles, nos que varios participantes optaron por empregar raiaduras de laranxa ou ata algúns toques de canela ou chocolate moído.
Unha galega entre os finalistas
O colofón chegou coa ornamentación dos combinados. Anacos de froitas colgados nos costados ou en forma de petiscos e palliñas de diversas cores puxeron a guinda final.
A pesar da profesionalidade dos participantes, tampouco faltaron os nervios, como produto dunha competición deste nivel nos que se miden os mellores camareiros de España.
Por parte de Galicia, chegou á final Marta Pérez, cun cóctel no que un chorro de nata achegou o toque persoal a unha maxistral combinación de vodka e zume de kiwi. Precisamente, nesta ocasión púidose ver como tamén este mundo está a innovarse con achegas como cremas ou a procura de texturas máis escumosas.
Se algo manifestaron os membros da organización foi o alto nivel que se rexistrou nesta edición, da que sairá o próximo representante español para o Campionato Mundial de Coctelería. A sorte está botada e este mércores, a partir das 21.00, o barman máis creativo poderá celebrar a súa vitoria.
