O Consello Regulador da Denominación de Orixe Ribeiro convoca o IV concurso de ideas para seleccionar a súa imaxe publicitaria. A proposta que resulte gañadora, que será premiada con 9.000 euros, empregarase para publicitar a calidade e promocionar o consumo dos viños desta D.O. nos distintos medios impresos.
As bases do concurso teñen algunhas modificacións con respecto a anos anteriores. Cambios que afectan á data de entrega dos orixinais, que será ata o próximo día 5 de setembro de 2008, e ao importe total do premio do gañador, que se incrementou.
O CRDO Ribeiro busca un cartel “que reflicta a situación actual dos viños da D.O. e un slogan memorizable e que se asocie perfectamente ao produto”. No consurso poden participar axencias de publicidade e creativos de calquera nacionalidade.
