A Indicación Xeográfica Protexida (IGP) Tenreira Galega acudirá ao Fórum Gastronómico Xirona 2009, que este sábado se pon en marcha no Palau de Congresos da cidade catalá. A súa achega concentrarase, fundamentalmente, nun relatorio-taller o domingo día 22.
Durante os cinco días días do encontro, o IGP avogará polo aproveitamento integral da tenreira na alta cociña.
Tenreira Galega acudirá ao Fórum acompañada polo cociñeiro Javier Rodríguez Ponche 'Taky', onde participará nun taller-degustación.
Unha breve presentación do IGP marcará o comezo do relatorio, no que o campión español de cociñeiros no ano 2000 e de Galicia protagonizará un novo diálogo cun profesional carniceiro ao que lle solicitará o despezamento 'in situ' de tres cortes de carne para potenciar o seu uso na alta cociña.
Tres cortes para tres receitas
Será con estas pezas coas que elaborará tres receitas co seu respectivo uso culinario. O taller permitiralle ao público asistir en directo ao despezamento de cortes procedentes da canle de vacún de carne que formará parte, ademais, do orixinal decorado da sala.
Ao longo da demostración tamén se fará fincapé en todos aqueles aspectos técnicos, por exemplo o corte ou a maduración, que inciden de xeito fundamental na calidade final da carne de Tenreira Galega.
Deste xeito, poderanse ver algúns cortes especiais ao detalle, co fin de conseguir o mellor resultado culinario, sacándolle a máxima esencia á carne de calidade certificada por Tenreira Galega.
O obxectivo desta iniciativa é mostrar ao público os novos usos culinarios de pezas que historicamente ocuparon postos de pouca importancia na alta cociña.
Valorización
A finalidade é valorizar todos os cortes da tenreira galega, elevándoos á primeira división da gastronomía, rompendo cos tópicos comúns na cociña cotiá e mellorando o aproveitamento de determinadas pezas do vacún.
Preténdese, seguindo a liña profesional de Javier Rodríguez, traballar un perfil culinario evolucionado, respectando a sabedoría da cociña tradicional galega e utilizando produtos con selo de calidade e amparados polo distintivo de Tenreira Galega.
Ademais desta actividade, xunto co cociñeiro Javier Rodríguez, Tenreira Galega terá tamén unha destacada presenza na caseta institucional da Consellería de Medio Rural, realizando demostracións culinarias, que nesta ocasión ofrece o programa de catas e degustacións de produtos galegos con indicativo de calidade, baixo a lema 'Degusta Galicia'.
Tenreira Galega quere triunfar na alta cociña
