Adegas Pittacum celebra o seu décimo aniversario cun incremento do 80% no nivel de exportacións, que xa supoñen o 30% da comercialización dos viños Pittacum barrica, Pittacum Aurea e o rosado Tres Bispos
Adegas Terras Gauda celebrou o décimo aniversario de Adegas Pittacum (D.O. Bierzo) cun acto en Ponferrada presentado por Fernando Ónega ao que asistiron máis de 200 autoridades políticas e personalidades do mundo empresarial, social e cultural de Castela e León.
O director xeral de Adegas Terras Gauda e Pittacum, Enrique Costas, destacou na súa intervención a filosofía empresarial que comparten ambas as adegas baseada en elaborar viños cunha marcada singularidade e personalidade como elemento diferenciador, nos que se identifica a orixe e a procedencia.
O director técnico de Adegas Pittacum, Alfredo Marqués, recordou que esta adega foi pioneira no Bierzo nos anos 90 cun novo modelo de viticultura, no que se coidaba de forma especial a vide e incorporábase a calidade aos procesos de elaboración e produción, co que se logra a autenticidade que caracterizan os viños Pittacum barrica, Pittacum Aurea e Tres Bispos.
Ao acto, que tivo lugar no Museo do Bierzo en Ponferrada, acudiu o alcalde da cidade, Carlos López Riesco, o subdelegado do Goberno en León, Francisco Álvarez Martínez, o presidente do Consello Comarcal do Bierzo, José Luís Ramón Curral, o presidente do Consello Regulador da Denominación de Orixe Bierzo, Afonso Arias, así como alcaldes da zona e representantes das institucións.
Adegas Pittacum, que forma parte de Terras Gauda desde o 2002, conseguiu en só unha década consolidarse en 24 mercados internacionais de Europa, Asia, América e Oceanía incrementando no 2008 un 80% o seu nivel de exportacións, que xa supoñen o 30% da comercialización dos seus viños.
Adegas Pittacum obtivo no 2008 un gran éxito co lanzamento do rosado Tres Bispos o ano pasado, especialmente en Bélxica e o Reino Unido, e logrou que a prestixiosa naviera Viking Line de Finlandia seleccionase o Pittacum barrica para incluílo na carta de viños dos seus cruceiros. O Pittacum Aurea foi elixido polo prestixioso experto David Schwarzwälder como representante do Bierzo na cata de presentación ''novos valores españois'' celebrada en Berlín.
