No Parador de Turismo de Monforte catábanse hoxe os caldos para ver que adegas son susceptibles de distribuírse en EEUU por parte de Eric Solomon Selections. Das 38 mostras presentadas, 5 eran de branco e 5 de barrica. O catador encargado da selección, Daniel González, escolleu 3 marcas cuxas notas pasará a Eric Solomon, que previsiblemente visitará a Ribeira Sacra tras o verán, para manter encontros con responsables destas adegas e iniciar o traballo.
Eric Solomon acudirá con propostas concretas segundo a adega, e será o produtor quen teña a última palabra.
Segundo informou o C.R.D.O. Ribeira Sacra, a empresa estadounidense busca nun viño: calidade, prezos idóneos, presenza estética da botella e etiquetaxe, así como un determinado volume de produción. Segundo as características das marcas seleccionadas haberá que incidir nun ou noutro aspecto, en conversacións coas adegas.
Para o catador Daniel González o futuro de Ribeira Sacra en Estados Unidos depende do que se faga nos próximos 4 ou 5 anos, pero se se fai algo diferente é posible convencer ao cliente. Apuntou tamén que os viños en EEUU triunfan por calidade e personalidade e cre que Ribeira Sacra ten bo viñedo e terreo con moita personalidade, que é o máis difícil de sacarlle á uva; polo tanto, ten a base para conseguir o éxito. Segundo Daniel González, o futuro da zona pasa polo viño de barrica, pero comedido, “utilizando máis a barrica como condimento que como ingrediente”.
Novos pasos
Segundo a D.O. Ribeira Sacra, con esta cata quedan dados novos pasos para a distribución destes caldos en EEUU; a relación que Eric Solomon teña a partir de agora cos viños desta zona dependerá do que defina o propio mercado e neste caso –engaden desde a D.O.– hai que resultar especialmente atractivo para o público feminino, xa que a decisión de compra de viño en Norteamérica depende sobre todo das mulleres.
Esta foi a primeira vez que Eric Solomon Selections se achega de xeito oficial á Ribeira Sacra; antes que el estiveron outros importadores, e de feito varias adegas abriron mercado xa neste país.
Tres viños da Ribeira Sacra, seleccionados para 'facer as américas'
