O concelleiro de Promoción Económica e Turismo de Compostela, Xose Manuel Iglesias, entregou a Rafael Castillo Vilumbrales e Roberto Muñíz Poo dúas pantallas Lcd de 19 polgadas, como premio por completar o 'Tapasporte', consumindo polo menos unha tapa nos 45 establecementos participantes en Santiago(é)Tapas, o primeiro concurso de cociña ‘en miniatura' celebrado na capital galega.
Entre o sábado 28 de xuño e o mércores 2 de xullo estas dúas persoas, naturais de Vedra, completaron o seu Tapasporte, tras percorrer as 5 (e)TAPAS ou rutas creadas para o concurso: Praza do Obradoiro, Praza de Cervantes, Praza de Galicia, Praza Roxa e Camiño Francés.
Pero non son eles os únicos premiados. O concurso, que arrincou o pasado sábado 28 de xuño e rematará o 13 de xullo próximo, xa entregou a 12 persoas 23 premios directos e aínda quedan máis de 1.000 a disposición do público participante, consistentes en botellas de viño e cursos de cata, cheques regalo de 10 euros, camisetas, guías gastronómicas e Walking Tours de Turismo de Santiago.
Ademais, quedan 3 pantallas LCD de 19 polgadas para as seguintes 3 persoas que enchan o Tapasporte con todos os selos dos establecementos de todas as (e)TAPAS e entre os restantes Tapasportes completados antes do 13 de xullo sortearanse outras 5 pantallas LCD.
Máis de 4.000 Tapasportes recollidos
Son máis de 4.000 os Tapasportes recollidos na oficina do concurso, situada na Praza de Galicia, e nos establecementos de hostalería participantes. Como fan os peregrinos coa súa credencial, os usuarios do Tapasporte reciben un selo tras consumir a súa tapa en cada local. O público tamén pode votar a súa tapa favorita co posavasos oficial do concurso e entre os votos emitidos sortearanse 2 billetes de avión de Air Berlín a calquera destino europeo.
Son grupos de amigos ou de empresa e parellas os que máis información están a demandar e participan máis activamente no concurso. Os turistas non quedan á marxe e grupos de alemáns, estadounidenses, ingleses... percorren os establecementos participantes co seu Tapasporte.
Cada local de hostalería presenta entre 1 e 3 tapas, ata chegar ao total de 113 tapas a concurso. En www.santiagoetapas.com está a disposición do público a ficha coa receita de cada tapa, algunhas tan orixinais como ‘Esencia de pementos de Padrón', ‘Briouats de lagostinos' ou ‘Peixe sapo escabechado con mirabeis sobre torrada de broa'.
Turismo entrega as dúas primeiras pantallas Lcd de Santiago(é)Tapas
