O blogue Uvinum, un dos que teñen máis proxección entre os afeccionados ao mundo da viticultura do país, inclúe o Centro do Viño de Monforte entre os seis mellores museos do sector que hai España.
O espazo, que describe a cultura vinícola da Ribeira Sacra situado en Monforte, comparte protagonismo e está á altura de centros como o Museo da cultura do Viño Dinastía de Vivanco (A Rioxa), Museo do Viño de Aldeanueva de Ebro (A Rioxa), Museo do Viño de Peñafiel (Valladolid), Museo do Viño Mosteiro de Pedra (Cidade Real) e o Museo do Viño de Pagos do Rei (Zamora).
O artigo valora tres aspectos dos centros. As construcións en si mesmas e a súa inserción na cultura do viño de cada unha das zonas; as actividades, exposicións permanentes e temporais que organizan os centros para difundir as potencialidades das respectivas áreas vinícolas; e a posibilidade que dan os propios museos para que os visitantes entren en contacto cos distintos viños, poidan probalos ou adquirilos.
No caso do Centro do Viño da Ribeira Sacra está situado a poucos quilómetros da zona de cultivo de viñedos e no seu interior conta cunha exposición permanente que, a pesar de estar exposta de xeito moderno, achega ao espectador á viticultura tradicional a través dos estímulos visuais, olfativos e táctiles. Tamén confire especial protagonismo ás persoas que traballan no sector do viño na Ribeira Sacra, desde os grandes adegueiros aos pequenos viticultores das ribeiras do Miño e do Sil.
Ademais, a actividade do centro ao longo do ano é moi variada e inclúe catas, exposicións e cursos para difundir a cultura do viño.
Tamén se dá especial valor á tenda na que o consumidor pode acceder a gran parte dos viños da Denominación de Orixe Ribeira Sacra. O catálogo da tenda inclúe 196 referencias de produtos da comarca, 159 son viños e, o resto, licores.
Uvinum é un blogue creado en Cataluña pero de difusión nacional no que se publican todo tipo de artigos relacionados co sector. Edita as valoracións de guías e catas, premios e recomendacións relacionados co consumo desta bebida, tendencias... Tamén inclúe unha tenda virtual coa súa pertinente aplicación para móbiles que se converteu nun auténtico éxito tanto entre o público máis experto dentro do mundo do viño como entre os afeccionados que dan os seus primeiros pasos.
EN CIFRAS
Uns 12.000 turistas cada ano
Segundo os últimos datos presentados por empresa que xestiona o Centro do Viño da Ribeira Sacra, entre xuño de 2013 e xuño de 2014 achegáronse ás instalacións 12.052 turistas para pedir información sobre a Ribeira Sacra, dos que 2.883 visitaron as súas exposicións.
Vendas
Nos doce meses que analiza o balance, na tenda do centro vendéronse 11.050 botellas de caldos e licores da Ribeira Sacra.
