Un clásico do polbo á feira en Ribadeo

O Queimada de Ribadeo forma parte desa relación de bares e tabernas que gozan dun merecido crédito á hora de tomarse uns viños e pola súa oferta de racións, que garante unha boa pitanza a un prezo módico.

Este establecemento ten fama, desde hai décadas, pola elaboración do polbo á feira. José Lombardero Bellón e Gema García Díaz, responsables do mesmo desde 2008, manteñen viva esta tradición. Serven o cefalópodo cortado en anacos anchos e finos sobre o típico prato de madeira. Chama a atención a uniformidade na repartición do pemento. Cada día cocen á vez varios polbos enteiros nunha xigantesca pota para garantir a plenitude do seu sabor.

O polbo á feira é a ración máis demandada, pero vale tamén a pena probalo á vinagreta. Ao cocerse moito polbo, en ocasións sérvese como tapa cos viños e cervexas, feito incluso con outras receitas, como guisado, encebollado ou ao ajillo.

Os pementos de Padrón son outra alternativa apetecible. Os entendidos sinalan que son máis ricos canto máis pequenos. A menor tamaño redúcese, ademais, o risco de que piquen, aínda que se dan excepcións á regra. Hai que consumilos recentemente fritos, quentes e aderezados con sal logo da súa preparación, do mesmo xeito que sucede co polbo á feira. Uns excepcionais chipirones fritos son un bo complemento ao polbo e aos pementos, aínda que non se deben descartar outras opcións, como as croquetas caseiras de marisco.

ORELLA

Os produtos do porco, con tanto tirón en Galicia, están presentes na oferta do Queimada. A orella, aderezada con pemento e aceite, gusta moito á clientela, ata o punto de ser a segunda ración máis solicitada. Sobresaen tamén as racións de zorza, incorporadas hai dous anos. Son moi abundantes e saborosas, grazas sobre todo á calidade da materia prima, adquirida nunha carnicería próxima.

Xunto co polbo, un dos pratos que máis me chamou a atención foi o lacón cocido, acompañado de cachelos. O pernil cocíñase enteiro, como mandan os canons. A diferenza doutros locais, no Queimada sérveno cortado en pequenos anacos, o que permite unha degustación máis intensa.

O xamón ou os rolos recheos de queixo e bacon completan o substancioso cartel de racións deste establecemento.

O Queimada é un lugar moi frecuentado dentro da ruta local dos viños, tanto pola veciñanza como por visitantes ben informados. á fidelidade da clientela contribúen as saborosas tapas, a amabilidade do persoal e a súa céntrica localización. Algúns clientes optan polo clásico ribeiro en cunca. Os caldos da Ribeira Sacra e da Rioxa -Ramón Bilbao, Luís Cañas e Azpilicueta, principalmente- teñen bastantes máis fieis que os brancos.