A carne de porco celta e as castañas suman os seus valores nutricionais nun estudo iniciado fai máis dun ano por un equipo da facultade de Ciencias da Alimentación, do campus de Ourense (Universidade de Vigo) que indaga sobre a influencia dunha dieta a base de castaña na calidade da carne autóctona.
O "investigador principal" do equipo formado por 20 persoas é o catedrático Javier Carballo, que explicou a GG algúns dos achados trala aplicación de tres dietas diferentes a tres grupos de porcos celtas a base de só penso, só castañas e outra combinada.
A carne dos tres grupos se troceou e elaboráronse chourizos cunha parte para facer un estudo global no que xa se descubriu, segundo Carballo, que a dieta a base de castañas dá á carne un sabor totalmente diferente ao habitual e máis doce.
Tamén inflúe nos ácidos grasos da carne conseguida que terá máis dos do tipo "insaturado" (os que favorecen o equilibrio entre o colesterol malo e o bo).
O primeiro inconvinte desa alimentación é que a maior presenza de ácidos grasos insaturados favorece a oxidación da carne e a pon "rancia" pero, segundo Carballo, isto poderase evitar engadindo algún antioxidante.
Desde o seu punto de vista, o estudo permitirá sumar os potenciais de ambos os produtos o que impulsará a revalorización da raza autóctona "porco celta" e a diversificación no uso das castañas.
"En comarcas como a Ribeira Sacra isto podería supor unha recuperación dos traballos ao redor dos castiñeiros xa que hoxe producen toneladas pero ninguén as recolle", agregou.
O estudo é un dos proxectos do Plan Nacional de Investigación, Desenvolvemento e Innovación (I+D+i) e o seu final está previsto para o ano 2011.
