Unhas vinte adegas das Rías Baixas participaron en Estados Unidos nunha presentación desta Denominación de Orixe co obxectivo de promocionar os seus produtos alén do Atlántico. Durante o acto, analizouse a situación do mercado estadounidense e as accións promocionais previstas para este ano pola marca galega.
Así, entre as campañas previstas para 2010 destinadas a publicitar os produtos da Denominación incluiranse seminarios de formación en escolas de alta hostalería, showrooms para que as adegas dean a coñecer os seus produtos, visitas de sumillers e importadores a Rías Baixas ou a presenza en festivais de viño e gastronomía, entre outras.
A xornada de presentación das adegas das Rías Baixas concluíu cun seminario sobre o aproveitamento das redes sociais para a difusión dos produtos desta Denominación galega.
Na actualidade, Estados Unidos supón o segundo mercado de maior demanda dos caldos galegos, despois do que representa o da propia comunidade autónoma.