O tratamento de augas residuais na ría de Pontevedra incumpre a normativa, conclúe Europa

O Tribunal de Xustiza da Unión Europea (TJUE) ratificou este xoves que o tratamento das augas residuais da Ría de Pontevedra incumpre a normativa comunitaria. O alto tribunal europeo considera que as augas residuais de Pontevedra, Poio, Marín e Bueu non están tratadas adecuadamente.

O TJUE ditaminou que España incumpriu algunhas obrigacións en virtude da directiva de 1991 sobre tratamento adecuado de augas residuais urbanas nas aglomeracións da provincia de Pontevedra, e a de Banyoles, en Xirona. En cambio, dá a razón a España ao non ver incumprimento da normativa nas aglomeracións de Bollullos Par del Condado (Huelva), Abrera e Capellades (ambas na provincia de Barcelona). 

A Comisión Europea denunciou a España en novembro de 2014 ante a Xustiza europea por tratar adecuadamente as augas residuais en "zonas sensibles" no prazo esixido. 

En concreto, por incumprir coas súas obrigacións respecto dos sistemas colectores e ás instalacións de tratamento de augas residuais urbanas nas aglomeracións de máis de 10.000 equivalentes habitantes en zonas sensibles. Así mesmo, por non considerar verteduras en zonas de captacións de zonas sensibles e incumprir obrigacións respecto dos lodos orixinados no tratamento das augas residuais. Iso si, retirou as súas denuncias por insuficiente designación de zonas sensibles e respecto da identificación de zonas menos sensibles en recoñecemento á progresiva regularización das instalacións de saneamento e tratamentos e verteduras de certas aglomeracións. 

Na súa sentenza deste xoves, o Tribunal de Xustiza da UE avalou que España incumpriu a obrigación de garantir un tratamento secundario ou un proceso equivalente das augas residuais que entran nos sistemas colectores na aglomeración de Pontevedra-Marín-Poio-Bueu. Tamén aquela que obriga a realizar un tratamento máis rigoroso antes de vertelas en zonas sensibles cando se trata de verteduras procedentes de aglomeracións urbanas con máis de 10.000 habitantes, algo que tamén incumpre a aglomeración de Berga, Figueres, O Terri (Banyoles). 

En canto ás aglomeracións de Bollullos Par del Condado e de Abrera, o Tribunal de Xustiza da UE falla que non procede declarar o incumprimento da normativa europea como pedía a Comisión Europea, que alegou que España non achegara unha toma de mostran durante doce meses para demostrar que as aglomeracións cumprían os parámetros fixados. O Tribunal considera que a directiva non esixe que se recollan mostras durante todo un ano e España, ademais, achegou á Xustiza europea todas as mostras cuxa falta constituía o único fundamento de incumprimento alegado pola Comisión. 

Para rematar, respecto da aglomeración de Capellades, o Tribunal de Xustiza europeo tamén deu a razón a España porque a Comisión Europea non achegou datos suficientes para demostrar a incorrecta aplicación das normas españolas aprobadas para cumprir coa directiva a partir do 23 de xuño de 2014, a data na que expiraba o prazo que Bruxelas deu a España para cumprir as súas obrigacións para o tratamento adecuado das augas residuais urbanas.