Un veciño de Bóveda de 41 anos de idade, O.D.A., que participaba nunha batida de caza maior na parroquia de San Fiz, resultou ferido de gravidade na tarde do domingo ao ser alcanzado por unha bala disparada por outro membro da cuadrilla. O home foi trasladado rapidamente polos seus compañeiros nun coche particular ao hospital comarcal monfortino, onde foi estabilizado. Tras realizarlle varias probas diagnósticas decidiuse a súa evacuación ao hospital universitario da Coruña nun helicóptero do 061.
Todo apunta a que o ferido foi alcanzado de rebote por unha bala de escopeta. O proxectil entroulle polo costado esquerdo, por baixo da axila, e quedou aloxado á altura das costelas ao lado dereito.
Os feitos ocorreron sobre as cinco da tarde do domingo, cando unha coñecida cuadrilla de caza maior de Bóveda, que sae a abater tanto xabarís como corzos, saíu pola parroquia de San Fiz, concretamente pola zona do Gruñedo, un espazo situado por encima da parroquia da que é natural o ferido, Eimer.
Familiares do accidentado e amigos de caza concentráronse diante do servizo de Urxencias do Hospital de Monforte, sentíndose moderadamente aliviados ao saber que, a pesar da gravidade da ferida, O.D.A. atopábase estable e era trasladado a un centro especializado da Coruña para intervilo cirurxicamente.
O ferido é unha persoa moi coñecida no municipio. O alcalde de Bóveda, José Manuel Arias, lamentou este accidente, á vez que destacou que O.D.A. é un cazador experimentado. "Leva cazando toda a vida, polo que tivo que ser cousa dá mala sorte", destacou o rexedor.
Ata o centro sanitario da cidade do Cabe achegáronse varias patrullas da Garda Civil, entre elas unha de Tráfico para facerlle a proba de alcoholemia ao compañeiro que supostamente foi o causante de sinistro.
EN CIFRAS. Cada ano morren en España aproximadamente 44 cazadores. Destes, 24 por disparo de escopeta, propia ou allea, e outros 20 por diferentes tipos de sinistros inducidos pola actividade.
Trátase de datos medios obtidos nos últimos dez anos e que forman parte das estatísticas que manexa Mutuasport, a mutua de cazadores que aglutina 220.000 seguros de responsabilidade civil e 430.000 de danos.
