As multas seguirán en Madrid Central por decisión da Xustiza

Dous xulgados madrileños decidiron este martes manter as multas en Madrid Central ao estimar que a protección á saúde e ao medio ambiente están por encima das "deficiencias no sistema" de sancións que alegara o Concello, que non recorrerá estas decisións xudiciais.

O novo Goberno municipal de PP e Ciudadanos estableceu unha moratoria ás multas en Madrid Central que arrincou o pasado 1 de xullo e tiña previsto estender ata o 30 de setembro, pero as sancións económicas volveron o 7 de xullo por decisión xudicial. O mesmo xuíz do Xulgado do Contencioso-Administrativo número 24 de Madrid que fai once días reactivou como medida cautelarísima as multas decidiu este martes manter a súa decisión tras estudar as alegacións do Concello.

Nas súas alegacións, o consistorio defendeu a moratoria polos problemas derivados no sistema de control e de multas, pero o xuíz responde que esa razón non é suficiente para superar o valor que debe ter a protección da saúde e o medio ambiente. máxime, engade, cando o Concello non habilitou ningunha alternativa. O recurso que conseguiu reactivar Madrid Central -proxecto estrela do Goberno municipal de Manuela Carmena- presentouno Ecoloxistas en Acción, que argumentou que a suspensión das multas atentaba contra a saúde pública dos cidadáns.

O Concello de Madrid anunciou que non recorrerá o auto xudicial, pero insistiu en que exporá "un modelo alternativo máis eficaz" ao considerar que esta medida "foi un fracaso en termos de contaminación e de mobilidade".