Control antisuicidio no cárcere para o mozo que cortou e comeu o corpo da súa nai

Alberto S.G, o mozo de 26 anos interno na prisión madrileña de Soto del Real desde o sábado tras, supostamente, matar a súa nai, descortizala, introducir anacos do seu corpo en táperes para despois guisalos e comelos permanece na enfermería do cárcere sometido ao protocolo antisuicidios. 

Fontes próximas á investigación do caso indicaron a Efe que, tras cumprir o procedemento habitual do ingreso en prisión como a toma de pegadas, fotografías e entrevistas co servizo médico, a dirección da prisión tomou a decisión de que o interno ingresase directamente na enfermería.

Ademais, acordou pór en marcha o protocolo antisuicidios o que significa que a recluso conta coa vixilancia doutro considerado de confianza para a prisión e denominado "preso sombra". 

Segundo as fontes consultadas, este interno permanece tamén na enfermería para así controlar a Alberto S.G, que foi detido o xoves na vivenda onde residía xunto á súa nai, Soledad G., de 66 anos, no barrio madrileño de Ventas.

Ao piso, situado no número 50 da rúa de Francisco Navacerrada, acudiu unha patrulla da comisaría do distrito de Salamanca despois de que unha amiga de Soledad mostrase á Policía a súa preocupación porque non a vía desde facía un mes.

Fontes próximas á investigación explicaron a Efe que cando os axentes chegaron e o mozo lles deixou entrar, atopáronse cunha escena dantesca, xa que o propio fillo mostroulles varios táperes de distintos tamaños con anacos da súa nai almacenados no frigorífico e no conxelador.

Non só iso, o presunto parricida recoñeceu que se comera xa algúns anacos, e mostra diso, engaden a Efe as fontes, é que na cociña había unha pota con restos dalgún guiso con verduras, polo que todo apunta a que o mozo cociñaba as partes do corpo da súa nai.

Algunhas delas, como ósos ou extremidades superiores, o detido deixárallas ao can, do que se fixeron cargo os servizos municipais veterinarios. 

A frialdade do fillo e as explicacións aos axentes no domicilio -logo en dependencias policiais preferiu non declarar- apuntan a un caso de canibalismo excepcional e a que o mozo sofre un trastorno mental, indican as fontes, que destacan que o detido consumía drogas e que contaba con doce antecedentes policiais por malos tratos á súa nai.

Segundo as fontes consultadas, a muller podería levar morta entre dúas e tres semanas, aínda que a autopsia aos restos fai difícil datar a data exacta.