O fiscal xeral de Estados Unidos, William Barr, recoñeceu este luns "serias irregularidades" na prisión onde estaba o millonario Jeffrey Epstein, achado morto na súa cela o sábado nun cárcere federal en Nova York, logo de ser acusado de trafico sexual de menores.
"Agora soubemos de serias irregularidades nestas instalacións que son profundamente preocupantes e pedimos unha investigación completa", dixo Barr nun acto da policía local de Nova Orleans.
O fiscal xeral prometeu que as autoridades chegarán "ao fondo do que ocorreu e haberá rendición de contas" e subliñou que tanto a Oficina Federal de Investigacións (FBI) como a do Inspector Xeral levan a cabo pescudas sobre o sucedido.
Barr destacou a importancia deste caso non só para as vítimas que" tiveron a coraxe de dar un paso á fronte e merecían a oportunidade de enfrontarse ao acusado no xulgado", senón tamén para el mesmo, o Departamento de Xustiza, os fiscais do Distrito Sur de Nova York e para os axentes da FBI que estaban a preparar o xuízo.
"Quedei arrepiado e, de feito, todo o Departamento (de Xustiza) quedou así, e francamente enfadado, ao saber do fracaso do MCC (siglas en inglés do Centro Correccional Metropolitano) para garantir adecuadamente a seguridade do prisioneiro", sinalou.
"Déixenme asegurarlles que este caso continuará contra calquera cómplice de Epstein", indicou Barr en relación ao caso que levou ao millonario a ser detido e agregou que ningún colaborador do acusado descansará tranquilo.
O fiscal xeral concluíu que as vítimas "merécense xustiza e terana".
Segundo medios de comunicación locais, que citan fontes próximas ao caso, os avogados de Epstein solicitaron a finais do mes pasado ás autoridades de prisións que retirasen ao seu cliente do programa para a prevención do suicidio.
A defensa fixo esta petición tras manter reunións de ata doce horas diarias co acusado, logo dun suposto intento de suicidio o pasado 23 de xullo.
A morte repentina e en estrañas circunstancias do magnate fixo que circulen numerosas teorías conspiratorias sobre o seu falecemento debido aos personaxes cos que se relacionaba o millonario, como o expresidente Bill Clinton (1993-2001), o príncipe Andrés, duque de York, ou o actual mandatario de EE.UU., Donald Trump.
Epstein xa afrontara acusacións similares no estado de Florida en 2008, aínda que entón chegou a un acordo co fiscal Alexander Acosta, posteriormente secretario de Traballo na Administración de Trump e que tivo que renunciar a este cargo polo escándalo desatado por un pacto secreto ocultado ás vítimas.
