O Goberno modifica o sistema para fixar as taxas universitarias en busca dunha rebaixa

Elimina o sistema de franxas introducido en 2012, co que calcula que o prezo medio do crédito se elevou un 17% e aumentou a "disparidade" entre comunidades. O ministerio quere fixar coas autonomías un importe máximo para as primeiras matrículas
Estudiantes en el campus de Lugo. XESÚS PONTE
photo_camera Estudantes no campus de Lugo. XESÚS PONTE

O Consello de Ministros aprobou este martes a derrogación do sistema de franxas para os prezos públicos de matriculación nos ensinos universitarios, que se introduciu en 2012 co PP e que, segundo o actual Executivo, provocou un aumento do prezo medio do crédito universitario dun 17%. Ese modelo é o que establece, por exemplo, que as taxas que abonan os alumnos deben cubrir entre o 0 e o 25% dos custos en primeira matrícula.

"Prexudicouse seriamente aos estudantes, moito máis aos que eran economicamente máis vulnerables", subliñou sobre o impacto dese sistema a ministra de Facenda e portavoz do Goberno, María Jesús Montero, na rolda de prensa posterior ao Consello de Ministros. Segundo o Ministerio de Universidades, o modelo "aumentou a disparidade nos prezos en función da comunidade". En Galicia, as taxas dos seus graos son as máis baixas do mapa estatal.

A reforma inclúese agora no real decreto lei aprobado este martes con medidas de apoio ao sector cultural para facer fronte á situación provocada pola pandemia do coronavirus, mediante unha disposición final coa que se modifica a Lei Orgánica de Universidades.

O Goberno quere abordar coas comunidades un abaratamento progresivo das taxas, que en Galicia están no nivel máis baixo do Estado

O ministerio asegura que o obxectivo é a redución este primeiro ano das taxas de primeira matrícula nos graos, para poder reducir progresivamente o resto das taxas de grao e taxas dos ensinos de máster. Aspira así a "traballar con todas as comunidades autónomas unha baixada progresiva das taxas a niveis previos a 2011 que beneficie ao estudiantado e o seu acceso á universidade", e abordar o tema no Consello Xeral de Política Universitaria a partir do día 7 para fixar o prezo máximo da primeira matrícula.

¿QUE SON AS PINZAS? A Lei Orgánica de Universidades de 2001 establece no seu artigo 81 que os prezos públicos dos estudos universitarios son fixados polas comunidades autónomas. Este artigo modificouse cun real decreto de 2012 no que se establecía por primeira vez ese sistema de pinzas para prezos públicos.

Na actualidade, para os estudos oficiais de grao, este decreto establece que os prezos públicos deben cubrir entre o 0 e o 25% dos custos en primeira matrícula, entre o 30 e o 40% dos custos en segunda matrícula, entre o 65 e o 75% na terceira e entre o 90 e 100% a partir da cuarta matrícula.

Segundo o Goberno, o resultado é que no caso da primeira matrícula as comunidades teñen a posibilidade de financiar a totalidade do seu custo facendo que sexa gratuíta para o alumnado, de maneira que, ao non haber prezo público como tal, consideraríase que cobre o 0% dos custos da prestación deste servizo. No outro extremo, para o alumnado que se matricula por cuarta vez, as comunidades poderían facer pagar un prezo que cubra a totalidade do custo.

Comentarios