lunes. 18.10.2021 |
El tiempo
lunes. 18.10.2021
El tiempo

Goberno e comunidades pactan 14 puntos para o regreso ás aulas

Unha aula baleira, nunha imaxe de arquivo. EP
Unha aula baleira, nunha imaxe de arquivo. EP
A posta en marcha virá acompañada do transporte e comedor escolar, con medidas de seguridade que elaborará cada territorio

O Ministerio de Educación e Formación Profesional pactou con todas as comunidades autónomas, fóra de Madrid e Euskadi, un acordo con 14 puntos sobre o próximo curso escolar e que parte dun regreso ás aulas en setembro coa actividade presencial como "principio xeral", a pesar da ameaza do coronavirus. 

Así o anunciou a ministra de Educación e Formación Profesional, Isabel Celaá, este xoves tras a reunión telemática que mantivo cos conselleiros autonómicos na Conferencia Sectorial de Educación. Neste encontro, o cuarto desde a declaración do estado de alarma, presentouse tamén un documento con recomendacións sanitarias para os centros de face ao retorno da actividade. 

O acordo subscrito polo Ministerio de Educación e as comunidades establece que o curso 2020-2021 terá 175 xornadas lectivas e os centros deberán adaptar as súas programacións didácticas para "recuperar os aprendizaxes imprescindibles non alcanzados" durante os meses de ensino a distancia polo coronavirus. Tamén se realizarán, segundo o acordado, plans de seguimento e apoio para o alumnado con máis dificultades. 

Con este acordo, as comunidades autónomas asumen a elaboración de protocolos de actuación para garantir a hixiene, limpeza e o control sanitario nos centros. Un traballo que realizarán xunto aos servizos de prevención de riscos laborais, e que incluirá medidas específicas para a atención das persoas incluídas no grupo de risco. 

Recae nas comunidades autónomas, que teñen transferidas as competencias educativas, o obxectivo de reducir "a fenda dixital"

As comunidades tamén se encargarán de preparar os plans de continxencia ante as "eventualidades" que poida provocar a evolución da pandemia no desenvolvemento do curso escolar, e terán que tomar "as medidas necesarias" para que os centros manteñan os seus servizos de transporte e comedor escolar "en condicións de seguridade". 

Do mesmo xeito, recae nas comunidades autónomas, que teñen transferidas as competencias educativas, o obxectivo de "reducir a fenda dixital" e "limitar" as súas consecuencias entre o alumnado, aínda que o Ministerio colaborará en mellorar a "oferta de recursos para o reforzo da competencia dixital" de profesores, familias e alumnos e porá en marcha, xunto ás consellerías rexionais, programas de cooperación territorial para "dar resposta á nova situación".

SÓ A DISTANCIA É OBRIGATORIA. Neste acordo non se inclúen as recomendacións anunciadas este pasado mércores polo Ministerio de Educación para o próximo curso. Entre elas, que os escolares de Educación Infantil e dos primeiros cursos de Primaria non terán que manter unha distancia interpersoal de metro e medio durante o próximo curso nin tampouco usar máscaras en clase, porque serán grupos "estables de convivencia" que evitarán mesturarse cos alumnos doutros cursos. 

A ministra Celaá recalcou este xoves que ese documento, elaborado xunto ao Ministerio de Sanidade, é só unha "base" que aínda pode recibir achegas das comunidades autónomas e que, polo tanto, non é definitivo nin de obrigada aplicación para o próximo curso.

Neste documento de recomendacións tamén se establecía que, a partir de 5º de Primaria, os pupitres terán que estar separados a metro e medio

O documento con medidas de prevención e hixiene fronte ao coronavirus permite clases de ata 20 alumnos, aínda que o texto precisa que o "ideal" é non superar os 15 escolares por aula. A ministra asegurou que iso non supón reducir os cocientes de estudantes por profesor que marca a lei. "é unha alternativa pero non é de obrigado cumprimento", dixo a ministra. 

Neste documento de recomendacións tamén se establecía que, a partir de 5º de Primaria, os pupitres terán que estar separados a metro e medio en todos os cursos. A mesma distancia que terán que gardar os estudantes para evitar contagios dentro do centro. Cando esa separación non sexa posible, o uso de máscaras imponse como obrigatorio. 

Na rolda de prensa posterior á Conferencia Sectorial, a primeira que celebrou Celaá con xornalistas na sala desde 

declaración do estado de alarma o pasado 14 de marzo, a ministra de Educación aclarou que a separación de metro e medio é, de momento, a única medida obrigatoria por lei que se ten que respectar o próximo curso nos centros educativos.

Celaá asegurou que "todos os centros educativos de España" están a traballar xa en optimizar "os seus espazos"

ADVERTENCIAS A MADRID. Díxoo recordando que esta medida aparece no real decreto lei que regula a nova normalidade, aprobado o pasado martes en Consello de Ministros, onde se obriga aos centros educativos a tomar "medidas organizativas que resulten necesarias para evitar aglomeracións e garantir que se manteña unha distancia de seguridade de, polo menos, 1,5 metros". 

Por iso, Celaá advertiu a comunidades como Madrid, que mostraron a súa discrepancia con estas medidas, que sería ilegal non respectar a distancia de seguridade entre os escolares o próximo curso. "Se Madrid non respecta a distancia estaría a incumprir a lei, e non creo que estea nesa disposición", dixo a ministra. 

Celaá asegurou que "todos os centros educativos de España" están a traballar xa en optimizar "os seus espazos" para favorecer a distancia de seguridade entre o alumnado. Isto inclúe a utilización de comedores, ximnasios ou bibliotecas para recibir clase, incluso recorrer a instalacións alleas "cando un centro non puidese de ningunha dos xeitos atopar espazos adicionais", precisou. 

Goberno e comunidades pactan 14 puntos para o regreso ás aulas
Comentarios