Sanitarios do Hospital Universitario Severo Ochoa de Leganés renderon homenaxe este venres a un compañeiro falecido con coronavirus, un enfermeiro de quirófano de 57 anos que loitou "incansablemente, durante días, contra a enfermidade" na unidade de coidados intensivos.
Un dos enfermeiros de urxencias no hospital, Francisco Javier Caneda Castro, recoñeceu que para todos os traballadores do centro este foi un día duro, xa que o compañeiro levaba semanas "loitando".
Con este, son tres os sanitarios falecidos na Comunidad de Madrid debido ao Covid-19. O Hospital Severo Ochoa trasladou o seu pésame "máis profundo e sincero" á familia, aos amigos e aos compañeiros de Esteban, especialmente á súa muller, que tamén é enfermeira do hospital de Leganés, un dos máis sacudidos pola pandemia de coronavirus desde o seu inicio.
O centro hospitalario enviou "unha enorme aperta de forza" a todas as persoas que, durante estes días, traballaron xunto a Esteban "nestes momentos tan difíciles". "Seguimos loitando, continuamos deixándonos a pel e, en tristes ocasións, tamén a vida, pero non dubidedes que conseguiremos vencer", dixeron desde o Severo Ochoa nun breve comunicado remitido aos medios de comunicación.
