Marlaska descarta dimitir e insiste en que non houbo inxerencias na investigación do 8-M

O ministro do Interior en funcións, Fernando Grande-Marlaska, durante a rolda de prensa que ofreceu este domingo. EMILIO NARANJO (EFE)
photo_camera O ministro do Interior, Fernando Grande-Marlaska. EMILIO NARANJO (EFE)

O ministro do Interior, Fernando Grande-Marlaska, deixou claro este martes que non vai dimitir, a pesar de que llo pediron os principais grupos da oposición, e insistiu en que nin el nin ninguén do seu departamento cometeu inxerencias na investigación da Garda Civil ao redor da autorización dos actos do 8 de marzo.

Tras unhas horas nas que algúns partidos da oposición volveron pedir a súa dimisión e, incluso, a súa reprobación, Marlaska repetiu no Senado os seus argumentos para xustificar o cesamento do coronel Diego Pérez de los Cobos, o mando do equipo de Policía Xudicial que foi comandado por unha xuíza de Madrid para investigar se o Goberno coñecía o risco de propagación do coronavirus nos actos do 8-M.

De feito, insistiu en que ninguén do seu equipo pediu a De los Cobos o informe entregado no xulgado, de cuxa existencia non sabían. "Ese informe, se tivésemos coñecemento, teriámolo antes, pero chegou á autoridade xudicial como debe ser". En calquera caso, o ministro explicou que a noite do xoves ao venres o informe filtrouse nada máis ser entregado ao xulgado, algo que preocupa "aos que traballan con este ministro", ao secretario de Estado de Seguridade e á directora xeral da Garda Civil, a quen apoia e que, segundo Marlaska, quixeron saber que pasaba con esa filtración. Porque, engadiu, "é un delito de descubrimento de segredos" e, xa que logo, interesáronse polo que estaba a pasar.

O ministro asegura que a directora da Garda Civil interesouse polo informe do 8-M tras filtrarse

O titular do Interior, apoiado por un longo aplauso da bancada socialista, insistiu en que ninguén pediu ese documento e en que o cesamento foi por motivos de conformación dos equipos, á vez que arremeteu contra o PP polos informes "preparados" que elaboraba cando gobernaba, e ben non chegaban ou ben evitaba que "chegasen á autoridade xudicial". 

Foi Fernando Martínez-Maillo, portavoz do PP no Senado, quen preguntou ao ministro se ía dimitir despois de que este martes El Confidencial publicase unha nota secreta asinada pola directora da Garda Civil, María Gámez, na que se sinala que De los Cobos foi cesado por non "informar o desenvolvemento de investigacións e actuacións da Garda Civil, no marco operativo e de Policía Xudicial, con fins de coñecemento". "Vostede é un recoñecido xuíz, pero é unha gran decepción", dixo Maillo, quen instou a Marlaska a saír do Senado "dimitido". 

Igual de airada foi a resposta do titular de Interior, quen asegurou que non ía dimitir porque "nin este ministro nin ningunha persoa do seu departamento fixeron ningún tipo de inxerencia", porque non pediron o informe nin tiveron acceso ao mesmo nin houbo inxerencias na súa tramitación. "O único que fixemos e estamos a realizar é unha nova conformación dos equipos", sinalou.

Comentarios