Un home de 62 anos, diagnosticado de listeriose, faleceu este mércores no Hospital Sierrallana de Torrelavega (Cantabria), un caso que non garda ningunha relación co brote orixinado en Andalucía xa que non consumiu carne mechada.
A Consellería de Sanidade informa nunha nota de prensa de que o home ingresou por un cadro febril e presentaba múltiples patoloxías graves, o que "condicionou unha evolución desfavorable do paciente".
O xefe de Vixilancia Epidemiolóxica da Consellería cántabra, Luís Viloria, dixo a Efe que é un caso "illado" producido polo consumo dalgún alimento contaminado, pero que non garda relación co brote pola carne mechada de Andalucía.
O falecido tiña un cadro patolóxico "moi complexo", con enfermidades cardiovasculares, respiratorias e metabólicas, e que padecía diabetes, hipertensión e apnea do soño.
O home ingresou a fin de semana no seu hospital de referencia, o de Sierrallana de Torrelavega, e desde o luns coñecíase que a analítica dera que tiña listeria.
A Consellería de Sanidade quere tranquilizar á poboación. "É un caso esporádico que aparece de cando en vez, tivemos a mala sorte de que evolucione de forma fatal e deuse a coincidencia dun caso destes, que pasa de cando en vez, co tema de Andalucía", apunta o xefe de Vixilancia Epidemiolóxica.
175 CASOS. O Ministerio de Sanidade elevou este xoves a 175 os casos de listeriose en Andalucía, Asturias, Estremadura, Madrid, Cataluña e Aragón polo consumo de carne mechada da marca La Mechá.
A maioría dos casos confirmáronse en Sevilla (131), pero rexistráronse casos en case todas as provincias da comunidade, con 15 en Huelva, 7 en Cádiz, e 4 en Granada e 4 en Málaga. Ademais, no resto de España hai 5 casos en Madrid, 4 deles con antecedentes de consumo en Andalucía e un neonato prematuro cuxa nai consumiu carne mechada nun bar de Madrid en xullo; 3 en Asturias, todos dunha mesma familia procedente de Sevilla diagnosticados en Xixón, entre eles unha embarazada que se atendeu ao seu regreso a Andalucía; 3 en Aragón, nunha familia de catro membros que compraron carne mechada en Sevilla e consumírona de vacacións no Pirineo Aragonés; 2 en Cataluña tamén da mesma familia que refiren consumir carne mechada da marca implicada traída por un familiar desde Andalucía, e un confirmado en Estremadura e outros nove aínda en fase de estudo.
Sanidade reitera que, aínda que a maior parte do produto foi distribuído en Andalucía, a Axencia Española de Seguridade Alimentaria e Nutrición (AESAN) informou da distribución do produto noutras comunidades:
