A ministra de Defensa e secretaria xeral do PP, María Dolores de Cospedal, confirmou o seu apoio á presidenta da Comunidade de Madrid, Cristina Cifuentes, despois de que renuncie ao máster da Universidade Rei Juan Carlos e pedido desculpas polas "condicións flexibles" das que gozou.
"Pareceume unha carta moi ben fundamentada e moi explicativa de todo o que ocorreu", sostivo Cospedal en declaracións aos medios antes de comparecer ante a Comisión de Defensa do Congreso. "E si, sígoa apoiando", subliñou ante as preguntas sobre o futuro da presidenta da Comunidade de Madrid.
Tamén lle mostrou o seu apoio o vicesecretario de Política Social e Sectorial do PP, Javier Maroto, quen definiu como "un acerto" a decisión de Cifuentes.
INSUFICIENTE PARA PSOE E CIUDADANOS. Con todo, para o portavoz de Ciudadanos (Cs) na Asemblea de Madrid, Ignacio Aguado, a renuncia de Cifuentes ao máster "non cambia nada" na posición do seu partido, e insistiu en que a presidenta rexional debe dimitir e o PP decidir a súa substitución.
En declaracións a Onda Cero, Aguado afirmou que a renuncia de Cifuentes ao máster nunha carta enviada ao reitor, Javier Ramos, segundo anunciou nunha das súas contas de Twitter, confirma que "houbo trato de favor".
É unha "fuxida cara a adiante", dixo o portavoz de Ciudadanos, quen se preguntou "por que, se fixo todo ben, renuncia ao máster", e engadiu que se aprecia o intento "de tapar, entre todos, unha presunta trama delituosa".
Na mesma liña, a líder de Cs en Cataluña, Inés Arrimadas, pediu ao PP que designe xa un presidente da Comunidade de Madrid "interino".
Pola súa banda, o secretario xeral do PSOE, Pedro Sánchez, sinalou que a renuncia ao máster é unha "condición necesaria, pero non suficiente" e pediu a súa dimisión. "Cifuentes está a recoñecer que mentiu e esa é a cuestión do caso", subliñou Sánchez.
