O primeiro ministro etíope, Abiy Ahmed, gaña o Nobel da Paz

Destaca a súa decisiva iniciativa para resolver o conflito fronteirizo con Eritrea
Abiy Ahmed. ALESSANDRO DI MEO
photo_camera Abiy Ahmed. ALESSANDRO DI MEO

O primeiro ministro etíope, Abiy Ahmed, gañou o Nobel da Paz, informou este venres o Comité Nobel de Noruega. 

Ahmed recibirá o galardón "polos seus esforzos por lograr a paz e a cooperación internacional e, en particular, pola súa decisiva iniciativa de resolver o conflito fronteirizo coa veciña Eritrea".

Co premio concedido ao líder etíope, nacido en 1976 en Beshasha, quérese "recoñecer a todos os actores que traballan en favor da paz e a reconciliación en Etiopía e nas rexións do leste e nordés de África", apunta o Comité.

O premio da Paz foise xa o ano pasado a África, ao recibilo o médico congoleño Denis Mukwege, que o compartiu coa activista iraquí yazidí Nadia Murad, ambos os distinguidos polos seus esforzos para terminar co uso da violencia sexual como arma de guerra e en conflitos armados.

Unha semana de anuncios
O Nobel da Paz pecha a semana destes prestixiosos galardóns, que se abriu o luns co de Medicina, seguido dos de Física e Química, ata chegar este xoves o de Literatura. O luns darase a coñecer o último, o de Economía.

A escritora polaca Olga Tokarczuk e o seu colega austríaco Peter Handke foron os gañadores do premio literario para 2018 e 2019.

O Nobel de Literatura entrégase este ano excepcionalmente por partida dobre, tras quedar en suspenso o correspondente á edición anterior polo escándalo por abusos sexuais que envolveu á Academia.

Todos os premios entregaranse o 10 de decembro, aniversario da morte do fundador, Alfred Nobel, nunha dobre cerimonia no Konserthus de Estocolmo e no Concello de Oslo, onde se celebra o da Paz. 

Comentarios