Puigdemont "non se rende" e chama á "unidade" do soberanismo

O avogado do expresidente da Generalitat Carles Puigdemont, Jaume Alonso-Cuevillas, explicou tras visitalo na prisión de Neumünster (Alemaña) que o viu "perfectamente resistente, forte, con coraxe e determinación" e asegurou que seguirá defendendo os seus ideais. 

En declaracións aos medios este martes tras a visita, xunto ao avogado Gonzalo Boye, Cuevillas explicou que agora hai que esperar a decisión do Tribunal Superior de Schleswig-Holstein sobre a euroorde e que manteñen unha "gran confianza na xustiza alemá". 

O avogado expresou que Puigdemont se considera un "preso político" e está disposto a soportar o que faga falta, nas súas palabras, e engadiu que confían en que o trámite da euroorde teña un bo resultado para eles. 

Puntualizou que tras a visita saen "máis animados" ao velo firme, con coraxe, con decisión e determinación, e que o expresidente repetiulles varias veces que non desfalecerá e que está en perfecta forma física e anímica. 

Cuevillas insistiu en que o seu estado de ánimo é excelente, que o trato que recibe no centro penal é "exquisito" e que está en condicións excelentes, sen concretar como é a situación de reclusión, e que recibe apoio doutros reclusos. 

Puigdemont trasladoulles a súa solidariedade coas persoas "que sufriron a violencia en Cataluña", e fixo un chamamento á unidade do soberanismo, indicou o avogado. 

Segundo Cuevillas, Puigdemont agradeceu as mostras de apoio recibido por persoas na cidade alemá e tamén a moitos presos que comparten instalacións con el. 

Pola súa banda, Gonzalo Boye asegurou que o expresidente está "feliz" pola decisión do Comité de Dereitos Humanos das Nacións Unidas de aceptar a súa demanda por vulneración de dereitos políticos.