Trump, sobre os fondos para silenciar a dúas mulleres: "Procedían de min, non da campaña"

O presidente de Estados Unidos, Donald Trump, insistiu este mércores, en declaracións á cadea de televisión Fox, en que o diñeiro achegado para silenciar a dúas mulleres polas súas supostas relacións con el procedía da súa fortuna e non da súa campaña electoral.

"Non viñan da campaña. Procedían de min", dixo Trump nunha entrevista con esa cadea conservadora que se emitirá este xoves integramente e da que este mércores se coñeceron extractos.

"De feito, o primeiro que preguntei foi se procedían da campaña. Iso podería ser un pouco turbio", agregou.

Este martes, o exabogado de Trump, Michael Cohen declarouse culpable en Nova York ante un xuíz federal de violar normas sobre financiamento de campañas electorais e recoñeceu xestionar antes dos comicios dous pagos, de 150.000 e 130.000 dólares, a dúas mulleres que aseguraban que mantiveron relacións co entón candidato republicano á Presidencia.

O mandatario apuntou que soubo "máis adiante" dos pagos realizados por Cohen.

En maio Trump xa recoñeceu abonar a Cohen 130.000 dólares pagados á actriz porno Stormy Daniels nun acordo de confidencialidade para acalar "acusacións falsas" de que mantiveran unha relación.

Eses pagos poderían violar as leis sobre financiamento electoral porque poderían considerarse un achegue ilegal da campaña de Trump.

O letrado asegurou que actuou "baixo dirección do candidato" e "co obxectivo principal de influír nas eleccións", implicando explicitamente a Trump neses posibles delitos.

Cohen admitiu, ademais, ser culpable de oito cargos, que inclúen evasión fiscal e fraude bancaria, e que poderían envialo a prisión durante anos.

Nos últimos meses, Trump tratou de distanciarse do que durante anos fora un dos seus máis estreitos colaboradores, despois de que en abril pasado a FBI rexistrase a oficina de Cohen e se incautase de multitude de documentos.