O presidente estadounidense, Donald Trump, considera un "xesto positivo de boa vontade" a liberación dos tres estadounidenses que Corea do Norte mantiña presos, semanas antes da súa histórica reunión co líder norcoreano, Kim Jong-un. Así o destacou a Casa Branca nun comunicado no que destacou que os tres parecen "estar en boas condicións e foron capaces de subir ao avión sen axuda".
A nota foi emitida pouco despois de que Trump anunciase a través da súa conta de Twitter que os estadounidenses presos no país viaxaban xa de regreso a EE UU no avión do secretario de Estado, Mike Pompeo, tras a visita deste a Pyongyang. Trátase de Kim Dong-chul, de 64 anos; Kim Sang-duk, de 58, e Kim Hak-song, que rolda os 60, todos nacidos en Corea do Sur e que posteriormente adquiriron a nacionalidade estadounidense. Estaban acusados de espionaxe ou actos hostís contra Corea do Norte.
O mandatario sinalou que aterrarán na madrugada do xoves, cara ás 02 horas (06 GMT), na base aérea de Andrews, nos arredores de Washington, e que el estará alí "para saudalos".
Pompeo viaxou a Pyongyang para preparar o histórico encontro entre Trump e Kim que se espera para as próximas semanas nun lugar aínda por precisar. Na súa mensaxe na rede social, o presidente estadounidense confirmou que Pompeo mantivo un encontro con Kim e que este "foi bo", e remarcou que o lugar e a data xa se definiron.
Ata agora, a Casa Branca dixo que a reunión entre Trump e Kim producirase a finais de maio ou principios de xuño e que se estaban barallando varios escenarios, entre os que figura Singapura e a fronteira entre as dúas Coreas, pola que o mandatario estadounidense expresou a súa preferencia.
