O produtor de Hollywood Harvey Weinstein vaise entregar este venres ante as autoridades para responder ás acusacións na súa contra por abusos sexuais, informaron este xoves medios locais. Segundo o diario Daily News, Weinstein porase a disposición das autoridades xudiciais por mor dunha causa aberta na súa contra pola fiscalía do distrito de Manhattan, unha das que iniciaron pescudas sobre o tema.
Polo menos existe outra investigación en curso contra el en Los Ángeles, e o mércores xurdiron versións que aseguran que os fiscais federais iniciaron as súas propias pescudas. De acordo co Daily News, a fonte consultada polo diario citou un dos casos aos que se enfronta, polo acoso sufrido por unha aspirante a actriz, Lucia Evans, para que lle practicase sexo oral en 2004 durante unha viaxe de negocios.
Distintas fontes consultadas por outros medios de comunicación por mor das primeiras versións aseguraron que Weinstein entregarase este venres, aínda que non houbo confirmación de parte do seu avogado nin da fiscalía mencionada nos informes.
A fiscalía do distrito de Manhattan está a cargo de Cyrus R. Vance, que á súa vez están a ser investigada pola fiscalía do estado de Nova York por non buscar o seu procesamento cando recibiu denuncias en contra do produtor de Hollywood. É posible que, se se confirma a presentación, unha vez coñecidos os cargos Weinstein quede en liberdade baixo fianza.
O produtor de Hollywood foi visto este mércores por medios de comunicación comendo no barrio de Malibu, en Los Ángeles, pero este xoves descoñecíase o seu paradoiro. As fontes do Daily News e doutros medios insisten en que o caso que será utilizado en primeiro lugar é o de Lucia Evans, pero tamén recordaron que Weinstein foi acusado en Nova York de presunta violación pola actriz Paz de la Huerta, en 2010.
O avogado de Weinstein, Benjamin Brafman, non fixo comentarios sobre os informes sobre a entrega do seu cliente, pero si dixo previamente que o produtor sostén que as relacións sexuais que mantivo coas denunciantes foron por consenso. O diario The Wall Street Journal informou este mércores que, ademais das pescudas que se están realizando nas fiscalías de distrito de Nova York e Los Ángeles, o caso está a ser investigado tamén pola fiscalía federal de Nova York.
As pescudas federais céntranse en se Weinstein puido atraer a mulleres ou inducilas a cruzar as fronteiras interestatais para terminar cometendo un crime sexual, algo que si podería ser procesado polas autoridades federais. De confirmarse estes informes, implicaría que o cerco xudicial contra o produtor de Hollywood amplíase ao intervir as autoridades federais.
Harvey Weinsten foi acusado por decenas de mulleres de acoso e abusos sexuais, en denuncias que apareceron en outubro pasado na revista The New Yorker e The New York Times, desataron unha onda de críticas que confluíron no movemento #MeToo.
Por mor dese caso apareceron moitas denunciantes que culparon do mesmo a outras figuras do mundo do cine e dos medios de comunicación. En Nova York, o fiscal xeral do estado, Eric Schneiderman, renunciou o 7 de maio por acusacións parecidas.
