O exministro Fernández Díaz: "O papa díxome que o diaño quería destruír España"
"O diaño quere destruír España". Esas son as palabras que o papa Bieito XVI lle diría ao exministro Jorge Fernández Díaz nun encontro que mantiveron en xuño de 2015, cando o pontífice xa ostentaba o cargo de emérito e o sucedera Francisco I. O que fora ministro do Interior entre 2011 e 2016 no Goberno do popular Mariano Rajoy fai esta confesión nun vídeo gravado aparentemente durante o confinamento e que agora está a circular polas redes sociais.
Fernández Díaz, ministro del Interior del PP de 2011 a 2016, afirma que Benedicto XVI le confesó que el diablo quería a destruir España.
— Daniel Bernabé (@diasasaigonados) June 11, 2020
De la policía política para tapar la corrupción y acabar con Podemos desconocemos si le dijo algo.pic.twitter.com/kh23CyBuBo
Fernández Díaz, membro do Opus Dei e de profundas conviccións relixiosas, asegura que o papa emérito lle dixo, nun momento de máxima tensión co independentismo catalán, que "o diaño quere destruír España". E non só iso. Bieito XVI profundaría na súa explicación: "O diaño sabe os servizos prestados por España á Igrexa, como a evanxelización de América...".
O paso de Fernández Díaz polo ministerio está marcado polo uso da chamada policía política para perseguir a adversarios doutros partidos. Unha comisión de investigación no Congreso concluíu, neste sentido, que houbo "abuso de poder" na súa etapa á fronte de Interior.
