domingo. 24.10.2021 |
El tiempo
domingo. 24.10.2021
El tiempo

A AAAG organiza en abril un roteiro na Coruña polas orixes familiares de María Casares

María Casares. DP
María Casares. DP

Estará conducido polo historiador Emilio Grandío, a investigadora María Lopo e a actriz Mabel Rivera e celebrarase o o 7 de abril cun máximo de 25 prazas previa inscrición 
 

A Asociación de Actores e Actrices de Galicia (AAAG) lembrará no mes de abril a figura de María Casares con diferentes actos no programa de actividades paralelas á gala dos Premios de Teatro, celebrados xa a semana pasada. A AAAG escolle datas próximas ao 14 de abril, aniversario da proclamación da II República, para homenaxear a actriz nada na Coruña que cedeu o seu nome aos galardóns da asociación

Desta volta, a programación incluirá un roteiro o vindeiro sábado 7 de abril polas rúas da Coruña no que se furará nas orixes familiares da actriz e un coloquio na Casa Museo Casares Quiroga o mércores 11 de abril no que diversos autores e investigadoras deitarán luz sobre a súa traxectoria. 


O roteiro organizado pola AAAG conta coa colaboración e condución do historiador Emilio Grandío e da investigadora María Lopo. Ademais, a actriz Mabel Rivera acompañará o percorrido coa lectura de fragmentos das memorias de María Casares Residente privilexiada.

Fixado para ás 11.30 horas do sábado 7 de abril, o traxecto iniciarase na Casa Museo Casares Quiroga (Rúa Panaderas, 12) e ten unha duración estimada de dúas horas. O itinerario percorrerá as rúas da Coruña e realizará paradas en puntos da xeografía coruñesa cunha especial significación para a familia de María Casares, tanto da rama do pai Santiago Casares Quiroga como da nai Gloria Pérez Corrales.

Para asistir ao roteiro, cuxa inscrición é gratuíta, cómpre inscribirse a través da web da AAAG neste formulario ou enviar un correo a [email protected] antes do venres 6 de abril ás 14.00 horas.  
 
COLOQUIO. A Casa Museo Casares Quiroga acollerá o 11 de abril ás 20.00 horas un coloquio sobre a figura María Casares no que participarán María Lopo, investigadora e autora da biografía de María Casares O tempo das mareas; a actriz Sabela Hermida, investigadora autora dunha tese de doutoramento da relación da actriz co existencialismo francés, e Ernesto Is, dramaturgo autor de Despois das ondas, texto dramático que obtivo en 2017 o Premio Rafael Dieste organizado pola Deputación da Coruña. A obra trata sobre a vida e traxectoria de María Casares.

A AAAG organiza en abril un roteiro na Coruña polas orixes...
Comentarios