O adestrador do Manchester City, o español Pep Guardiola, asegurou este mércores que non ten intención de regresar ao FC Barcelona e moito menos facelo como presidente.
"Volverei a Barcelona tarde ou cedo, pero ao Barça, e como presidente, esquecédevos. Un, para ser presidente, hai de estar preparado e ter coñecementos de moitas cousas e eu non os teño. Eu intento ser bo adestrador, que mal non me foi na última década, pero presidente non. Volverei vivir en Barcelona tarde ou cedo; é o único que podo garantir", afirmou.
Guardiola participou o mércores como patrón da Fundación Johan Cruyff, na inauguración dunha nova pista de fútbol para os nenos, esta vez en Hostalets de Pierola, moi preto da súa Santpedor natal.
Nesta ocasión, o técnico catalán non quixo valorar a actualidade do club azulgrana, empezando pola posible volta do brasileiro Neymar da Silva. "Vivín moito tempo neste club e non me gustaría que calquera opinión puidese mal interpretarse", respondeu.
Tampouco quixo profundar na posibilidade de que Neymar e Griezmann poidan xogar xuntos: "Todo dependerá da idea que teña a secretaría técnica e o adestrador e de como queiran xogar, pero os bos sempre son benvidos".
Iso si, admitiu que o holandés Frenkie de Jong e o belga Eden Hazard, fichados polo Barcelona e o Real Madrid respectivamente, son dous grandes xogadores e que o club que leve este verán ao holandés Matthjis De Ligt, "vai ter central para anos".
Preguntado por se o centrocampista do Atlético de Madrid Rodrigo Hernández 'Rodri' acabará este verán fichando polo City, Guardiola respondeu un lacónico "nin idea, xa se verá", mentres esbozaba un sorriso.
Aínda que negou, no entanto, chamar por teléfono o xogador para convencelo e tamén un suposto interese polo madridista Marco Asensio, asegurando que non hai "ningunha posibilidade" de que xogue ás súas ordes o curso que vén.
Para rematar, Guardiola desfíxose en eloxios cara ao centrocampista do City David Silva, que recentemente anunciou que a que vén sería a súa última tempada no fútbol inglés.
"Ouvino. Foi un dos grandes, non só do fútbol español senón tamén do fútbol europeo. Fixo unha década en Mánchester onde non é fácil coas súas calidades vivir nesa Liga e fíxoo incriblemente ben. A min persoalmente axudoume moito nestes tres anos que estivemos xuntos e, poderemos gozalo outro ano", concluíu.
