Os Comités provinciais do PSOE, reunidos este sábado, trasladaron as súas propostas de cara ás listas para as Cortes para as eleccións xerais do 28 de abril, nas que figuran pola Coruña Pilar Cancela e por Pontevedra Olga Alonso, nos primeiros postos.
No marco do mandato normativo de realizar as súas propostas de membros das candidaturas de cara ás próximas eleccións xerais, as agrupacións provinciais realizaron así as súas propostas, aínda que non teñen carácter vinculante e será o Comité Federal o que defina e aprobe as candidaturas finais.
No caso de Lugo e Ourense o Comité Provincial non realizou unha proposta en formato lista, e remitiu unha listaxe das votacións obtidas polos distintos candidatos para que sexa a dirección galega a que ordene a lista, ante a ausencia dun acordo claro.
Pola Coruña, o Comité provincial confirmou as candidaturas de Pilar Cancela e Pablo Arangüena nos postos 1 e 2 ao Congreso e resolveu a incógnita do terceiro posto ao situar a Montse García, concelleira das Pontes –concello do que é alcalde o secretario provincial Valentín González Formoso–.
En canto ao Senado, o primeiro lugar da proposta ocúpao Antonio Vázquez (Betanzos) e o segundo, o avogado Julio Barros, afín á secretaria local de Ferrol, Beatriz Sestayo, que foi situada no posto seis para a lista do Congreso, tras Diego Taibo, Natividad González Laso e Jesús Fernández Díaz.
No caso de Pontevedra, onde o PSOE nas últimas eleccións xerais de 2016 obtivo dous deputados ao Congreso –do mesmo xeito que na Coruña– foron aprobadas por aclamación as propostas de listas para as Cortes.
Para o Congreso, estará encabezada pola militante de Vigo Olga Alonso, ex secretaria comarcal de UXT e concelleira de Educación no goberno de Abel Caballero.
A continuación, situaríanse Guillermo Meijón e Ángeles Marra. O dirixente socialista de Arousa Modesto Pose, pola súa banda, encabezará a lista ao Senado, na que estará acompañado por Margarita Adrio e Daniel Chenlo.
LUGO E OURENSE. Tanto en Lugo como en Ourense acordouse remitir os nomes que obtiveron maior respaldo nas agrupacións locais.
En Lugo, trátase de Sonsoles López, próxima á provincial, e de Ana Prieto.
E do mesmo xeito, en Ourense, o Comité Provincial acordou dar traslado dos nomes de Juan Carlos Francisco Rivera, de Verín e Mariña Ortega do Carballiño para o Congreso, e de Eva Maldonado, de Ourense cidade, e Miguel Bautista Carballo, alcalde de Petín, segundo explicou a Europa Press o secretario provincial, Rafael Rodríguez Villarino.
VONTADE DO PSDEG DE QUE ENCABECE UNHA MULLER. En todo caso, desde o PSdeG incidiuse en que "a vontade é que nas catro provincias galegas a lista ao Congreso estea encabezada por unha muller".
