O ministro de Sanidade, Salvador Illa, defendeu este venres que non é necesario modificar a lei de saúde pública como reclamou o presidente da Xunta de Galicia, Alberto Núñez Feijóo, a quen recordou que el mesmo puido decretar durante os últimos meses coa lexislación vixente o confinamento de varias zonas da súa comunidade para controlar a expansión da covid-19, entre elas, a que actualmente está vixente en Ourense e Barbadás.
En rolda de prensa no Palacio da Moncloa tras o Consello de Ministros que decretou o estado de alarma en Madrid, Illa defendeu a utilidade das medidas vixentes e insistiu en que se o Goberno tivo que actuar en Madrid é porque non o fixo o Executivo rexional.
Así, descartou a proposta do presidente da Xunta de Galicia, que remitiu ao Goberno unha proposta de reforma da lei orgánica de saúde pública ao considerala "imprescindible para asegurar a seguridade xurídica, os dereitos dos cidadáns e o funcionamento correcto dos operadores xudiciais en España".
"Feijóo sabe que o que expón xa existe, el mesmo aplicou confinamentos perimetrales", respondeu o ministro de Sanidade en alusión ás medidas adoptadas nos últimos meses en varias zonas de Galicia, a última en Ourense e Barbadás.
COBERTURA LEGAL. Ademais, Illa defendeu a estratexia xurídica do Goberno para garantir a cobertura legal ás medidas que se adopten para facer fronte á pandemia e a denominada nova normalidade. "O Goberno foi activo para reforzar o marco xurídico para estas decisións e funcionaron en diversas comunidades", sostivo.
Entre elas destacou a reforma da Lei 29/1998 de 13 de xullo, reguladora da Xurisdición Contencioso-administrativa que, entre outros puntos, atribuíu a competencia aos Tribunais Superiores de Xustiza de cada comunidade autónoma.
Neste contexto, explicou que o Goberno da Comunidade de Madrid non invocou a lei de saúde pública ao aplicar as medidas de restrición da mobilidade adoptadas polo Ministerio de Sanidade, provocando con iso que o Tribunal Superior de Xustiza de Madrid 'tombase' a norma. E recordou que outros tribunais superiores, como os de Castela e León e Andalucía, si que deron o visto e prace.
"Estamos onde estamos porque algúns quixeron chegar aquí", acusou insistindo en que o Goberno busca sempre "colaboración e cooperación" con outras administracións pero actuará cando sexa necesario para protexer a saúde dos cidadáns.
