O litoral galego estará en alerta laranxa este martes por un temporal costeiro, que empezará este luns pola noite no noroeste e oeste da Coruña e irase estendendo desde a madrugada á costa de Lugo e Pontevedra. Ondas de ata 7 metros de altura e ventos que poden alcanzar os 100 quilómetros por hora en zonas como A Mariña lucense puxeron en alerta ás autoridades e os equipos de urxencias.
A Xunta activou a alerta de nivel laranxa (o segundo de tres niveis) en base aos prognósticos da axencia meteorolóxica pública Aemet e exhorta a cancelar todas as actividades no exterior dos centros educativos expostos ao temporal, así como as actividades extraescolares ao aire libre. Ademais, invita á poboación a tomar medidas preventivas, como suspender as actividades pesqueiras e marisqueiras nas áreas "máis perigosas" e evitar as de carácter deportivo marítimas.
CHOIVAS. Coa profunda borrasca chegará tamén a Galicia unha fronte frío ao final do día. Os ceos estarán parcialmente cubertos con precipitacións na metade oeste da comunidade, que serán xeneralizadas e de forte intensidade durante a madrugada do mércores.
As temperaturas experimentarán un ascenso, especialmente nos valores mínimos, que nas grandes urbes galegas non baixarán dos nove graos que se esperan en Lugo nas horas máis frías do día. En Pontevedra ou Vigo os termómetros non baixarán de 11º, mentres que na Coruña tocarán chan nos 14º e apenas haberá variación entre mínimas e máximas, xa que tampouco superarán os 16º.
Na capital lucense alcanzaranse os 13º, fronte aos 15º que rexistrarán de máxima a Boa Vila, Ourense ou Vigo.
