O Diario Oficial de Galicia (DOG) publica este martes as 56 candidaturas definitivas que concorrerán ás eleccións galegas do próximo 12 de xullo.
Os catro partidos que, en principio, parten con máis opcións de obter representación na Cámara autonómica -PPdeG, PSdeG, BNG e Galicia en Común-Anova Mareas- presentan candidaturas nas catro provincias.
Destas formacións, das que probablemente sairá o próximo presidente galego, dous presentan ao seu candidato por Pontevedra; PPdeG (Alberto Núñez Feijóo) e PSdeG (Gonzalo Caballero); mentres que as outras dúas fano pola Coruña, BNG (Ana Pontón) e Galicia en Común-Anova Mareas (Antón Gómez Reino).
Ademais, outros dous partidos con presenza nas Cortes, pero non en Galicia, como Vox ou Cidadáns, tamén presentan candidaturas nas catro circunscricións galegas.
Con todo, a formación de Santiago Abascal (Vox) non presenta candidato á Presidencia da Xunta, mentres que Ciudadanos confía esta tarefa a Beatriz Piñeiro, que encabeza a lista por Pontevedra.
Unha das novidades respecto das eleccións frustradas do pasado 5 de abril é a presenza de En Marea, tamén polas catro provincias, que concorre con Compromiso por Galicia e o Partido Galeguista coa marca Marea Galeguista.
A provincia na que máis candidaturas se rexistraron é Pontevedra, con 16, seguida da Coruña, con 14 e de Lugo e Ourense, con 13 en cada unha delas.
