O presidente do Goberno, Mariano Rajoy visitou este luns as obras da A-57 entre A Ermida e Vilaboa. Durante a súa estancia en Pontevedra chamou a atención unha vendaxe que inmobilizaba dous dedos da súa man dereita. E é que, segundo explicou o mandatario popular, rompeu unha falanxe nas vacacións de Semana Santa que pasou en Sanxenxo.
"Non llo diga a ninguén. Fíxenmo eu só", díxolle a unha xornalista segundos antes de subirse ao coche oficial.
Esta foi a única resposta que deu este luns o presidente do goberno durante o acto en Pontevedra, no que non se admitiron preguntas dos xornalistas.
UN FORTE DISPOSITIVO DE SEGURIDADE. O acto celebrouse no medio de fortes medidas de seguridade. Polo menos nove furgóns da Policía vixiaron os accesos á chaira que a construtora San José, concesionaria do tramo da A-57 entre A Ermida e Vilaboa, acondicionou o pasado fin de semana para a visita de Rajoy e o resto de autoridades.
