Agustín Martínez Becerra, avogado de catro dos cinco condenados a nove anos de cárcere por un abuso sexual a unha moza madrileña nos sanfermines de 2016, pedirá a posta en liberdade dos membros da Manada este venres ou, como moi tarde, o vindeiro luns.
Martínez Becerra comentou ademais que, debido á gran extensión da sentenza (máis de 370 folios incluíndo o voto particular dun dos tres xuíces), o recurso ao fallo xudicial ante o Tribunal Superior de Xustiza de Navarra aínda non está preparado, xa que continúa estudando a documentación.
O avogado sinalou que as partes teñen un prazo de dez días hábiles desde que lles foi notificada a sentenza para presentar o recurso e non descarta pedir unha prórroga dese prazo.
Desde o despacho de Carlos Bacaicoa, avogado da vítima, comentaron que aínda non presentaron ese recurso á sentenza que condenou aos cinco integrantes da Manada por abuso sexual e non por agresión sexual, como pedían o fiscal e as acusacións.
