As temperaturas primaverais desta semana alcanzaron valores 11 graos superiores ao normal en boa parte de España, como en Ourense, pero comezarán a descender a fin de semana, cando volverán as precipitacións, incluso en forma de neve, segundo a Axencia Estatal de Meteoroloxía (Aemet).
Este xoves a máxima de Galicia chegou aos 30,3 graos. Rexistrouse en Arnoia (Ourense). Na propia capital ourensá os termómetros rexistraron un pico de 28,4 graos, os mesmos que en Pontevedra. En Lugo e en Vigo a máxima foi de 26, mentres que en Ferrol quedou en 24,6 e na Coruña en 20. A mínima, en cambio, foi de -2,1 graos e rexistrouse ás 8.00 horas en Calvos de Randín (Ourense), o que dá unha mostra da gran amplitude térmica da xornada.
A portavoz da Aemet, Ana Casals, explicou a Europa Press que este episodio de altas temperaturas "entra dentro do normal" pois débense á variabilidade climática motivada por unha dorsal anticiclónica que non deixa pasar as borrascas atlánticas. "Son moi altas para esta época do ano. Onte (polo mércores) as máximas estiveron entre 7 e 11 graos centígrados por encima do normal en boa parte do país se se ten en conta todos os 8 de marzo entre 1981 e 2010", confirmou.