A comisión de garantías de En Marea decidiu este luns suspender "de forma cautelar" aos tres membros do comité electoral que pediron as claves para acceder ao censo electoral. A comisión de garantías tomou esta decisión a requirimento da coordinadora e este mesmo luns informóuselles aos afectados, segundo sinalaron fontes do órgano sancionador.
As persoas que están suspendidas de forma cautelar son Pablo Nieves, Martiño Ramos e Raquel Bernárdez, todos eles militantes de Esquerda Unida e pertencentes ao comité electoral.
As auditorías coñecidas revelan que desde catro direccións IP accederon sen garantías ao censo da formación, aínda que non houbo variación no mesmo, pero desde a coordinadora considérano irregular polo que piden o cesamento das persoas que conseguiron as claves para acceder ao mesmo.
Os tres teñen tres días para alegar esta suspensión aínda que durante este tempo as súas funcións como membros do comité quedaron delegadas nos tres suplentes da lista que foi elixida no plenario do pasado mes de outubro. Unha vez recibidas as alegacións, a comisión de garantías deberá avaliar de novo a información para tomar unha decisión en firme sobre o futuro destas tres persoas dentro da formación.