Un total de 32 establecementos participarán na quinta edición do concurso Cume Tapas de Monforte que se desenvolverá entre os días 11 e 26 deste mes. O colectivo de hostaleiros da cidade presentou o programa do certame, que cumpre a súa quinta edición, nun acto no que estivo presente Ana Santos, a actriz que dá vida a Elsa na serie de televisión Padre Casares, acompañada polo alcalde, o presidente dos hostaleiros da provincia e a delegada territorial da Xunta, Raquel Arias, que enxalzou o «potencial da gastronomía da Ribeira Sacra». Durante a presentación tamén se homenaxeou á xornalista Manola Porto pola súa traxectoria profesional.
Ana Santos mostrouse sorprendida polo tirón do certame e apuntou que era un «orgullo» exercer de madriña despois de que en edicións anteriores fixéseno Nuncy Valcárcel, Rosa Cedrón, Isabel Blanco e Lucía Pérez. Beatriz Vila, xerente da asociación de hostalería, apuntou que para o Cume Tapas sempre se elixía unha madriña, en feminino, por dúas cuestións. «Inaugurouse a senda con Nuncy Valcárcel, o que nos deu moita sorte polo que non queremos cambiar, ademais, para os homes reservámoslles a tarefa de ser compradres do programa de Entroido denominado ‘Estase Cocendo'».
O concurso seguirá a mesma liña de convocatorias anteriores. Cada local proporá unha única tapa e haberá dous xurados, un profesional e outro popular. Os consumidores poderán votar a súa proposta favorita a través dunha cartilla que se distribuirá nos establecementos e haberá un primeiro premio, un segundo e un terceiro para os máis votados.
O profesional elixirá a tapa máis creativa, a tradicional, a que mellor maride con viños Ribeira Sacra e a que mellor empregue o queixo Marqués de Cernadas..
PREMIOS
Os premios do Cume Tapas ofrecen algúns cambios. Os consumidores que enchan as cartillas cos seis selos mínimos que se lles esixen para elixir a tapa favorita entrarán nun sorteo de agasallos que inclúe circuítos de balneario, ceas, estancias de turismo rural e outras alternativas. Pero, ademais, aqueles que proben as 32 tapas e así o atestigüen cos selos optarán a tres viaxes. Aínda que non se coñecen os destinos, dous serán para parellas e un para unha familia completa.
As tapas venderanse a un euro cando noutras edicións establecéronse prezos diferentes. Esta medida aposta pola igualdade entre os participantes e tamén é unha forma de facer fronte á crise económica e non castigar o peto do consumidor, segundo díxose na presentación.
Hostais, hoteis e complexos de turismo rural farán prezos especiais para estancias durante o certame. Ao contrario que noutras edicións, nesta non haberá concurso nos locais nocturnos xa que se prevé organizar algo concreto para ese sector.
