Detido na Coruña por roubar nunha vivenda

A Policía Nacional detivo un home como presunto autor dun roubo no interior dunha vivenda da Coruña. Os axentes actuaron por mor dunha chamada que denunciaba o roubo de chatarra no interior dunha leira no lugar de Cances e viron a un home que tiraba distintos materiais cara ao exterior.

Ao indicarlle que saíse do recinto, o home saltou ao exterior por encima do portón e os policías procederon a comprobar as pertenzas que tiña. Os axentes atoparon nun peto do pantalón unha pequena folla metálica, duns sete centímetros, limada nun dos seus extremos, comunmente utilizada para abrir fechaduras.

Nese momento apareceu o propietario do inmoble que indicou que o avisou unha veciña de que a Policía estaba na súa casa e cando accedeu ao interior da leira atopou a porta de acceso á casa fracturada e derrubada, aínda que non botou en falta ningunha pertenza.

Procedeuse á detención daquel home como presunto autor dun delito de roubo con forza e foi trasladado a comisaría para confeccionar as correspondentes dilixencias. O arrestado, de 38 anos e con varias detencións anteriores, foi posto a disposición xudicial tras os feitos do 3 de maio, informa a Policía Nacional a través dun comunicado.