O furacán Dorian arrasou parte das Bahamas deixando ata o momento cinco mortos e danos incalculables, mentres segue este luns o seu camiño cara á costa de Florida (EE UU), que permanece en máxima alerta ante a forza do ciclón de categoría 4.
O furacán Dorian baixou este luns a categoría 4 na escala Saffir-Simpson despois de que os seus ventos máximos sostidos se reducisen a 145 millas por hora (233 km/h) e aínda permanece sobre o norte do arquipélago de Bahamas.
"As Bahamas están actualmente en guerra e sendo atacadas polo furacán Dorian", dixo o primeiro ministro Hubert Minnis, que confirmou a morte de cinco persoas polo desastre natural.
Previamente, o ministro de Asuntos Exteriores de Bahamas, Darren Henfield, dixo que hai informes extraoficiais de numerosos corpos flotando nas Illas Ábaco.
O funcionario indicou que as liñas eléctricas están caídas e as árbores derrubadas e asegurou que os equipos de rescate trasladaranse ás zonas onde hai información de persoas en perigo en canto as condicións o permitan e poder facer un balance oficial de vítimas e danos.
Nas imaxes difundidas por habitantes de Ábacos pódense ver automóbiles e casas baixo a auga que converteu as rúas en ríos, todo iso acompañado de ventos que nalgúns momentos se achegaron aos 350 quilómetros por hora.
Gran Bahama tamén resultou totalmente alagada e aínda sente a forza do furacán.
O cociñeiro español José Andrés publicou un vídeo desde as Bahamas no que se poden notar os fortes ventos e a torrencial choiva e anunciou que está listo para ofrecer comida aos damnificados.
We @WCKitchen are 80 miles from #HurricaneDorian eye & feeling this!! Imagine what the people of Abaco+Grand Bahamas will experience! Bahamas @opmthebahamas Goverment will need major help! @ClintonGlobal @RedCross @TeamRubicon ...Florida should also get ready for major winds! pic.twitter.com/lIa9ghhUdk
— José Andrés (@chefjoseandres) September 1, 2019
Doutra banda, o presidente de Estados Unidos, Donald Trump, emitiu declaracións de urxencia para os estados de Xeorxia, Carolina do Norte e do Sur, que se suman á aprobada o pasado venres para Florida.
O gobernador de Carolina do Sur, Henry McMaster, ordenou a evacuación obrigatoria a partir do mediodía deste luns das zonas costeiras.
Este domingo na noite, o gobernador de Xeorxia, Brian Kemp, dispuxo tamén a evacuación dos residentes de seis condados.
Os expertos do NHC prevén que Dorian se aproxime lentamente cara á costa de Florida, aínda que non chegue a impactar directamente grazas a un xiro gradual cara ao nornoroeste este martes.
"O furacán moverase perigosamente preto da costa este de Florida ata o mércores pola noite e logo preto das costas de Xeorxia e Carolina do Sur o mércores pola noite e xoves", sinalaron os expertos do NHC.
Aínda que se prevé un enfraquecemento gradual, Dorian seguirá sendo un poderoso furacán durante os próximos dous días mentres se dirixe cara ao norte.
Para o martes anticipan que o furacán terá unha forza de 145 millas por hora (233 km/h), o mércores continuará esta tendencia ata os 130 millas por hora (210 km/h) e o xoves presentará ventos máximos sostidos 125 (200 km/h), cando estea fronte á costa das Carolinas.
O gobernador de Florida, Ron DeSantis, pediu aos residentes permanecer "vixiantes", pois estará en todo caso moi preto da costa e o estado sufrirá o seu "impacto dunha forma ou outra".
Polo menos en 14 condados da costa este de Florida rexen desde este luns ordes de evacuación obrigatoria ou voluntaria.
Ademais, centos de voos foron cancelados en Estados Unidos e cinco aeroportos de Florida, un de Carolina do Norte e outro de Atlanta teñen restricións polo fenómeno meteorolóxico.
A diferenza da incerteza que vive a maioría dos floridanos, no paseo que bordea a praia de Miami Beach unha multitude de surfeiras carga as súas táboas para aproveitar as ondas de ata catro pés (1,20 metros).
De igual forma, na poboación turística de Juno Beach, centos de curiosos achegáronse hoxe á praia para inmortalizar nas redes sociais a súa presenza preto do furacán.
