Rajoy ofrece entendemento a Torra pero avísao de que fará que se cumpra a lei

O presidente do Goberno, Mariano Rajoy, ofreceu este luns "entendemento e concordia" a Quim Torra unha vez que sexa investido presidente da Generalitat, pero avisouno de que vai garantir que en todo momento cumpra a lei e a Constitución.

Rajoy enviou esta mensaxe a Torra, pediu "mesura" ante a nova situación e, en alusión a Ciudadanos, defendeu aparcar agora a "ansiedade", en declaracións aos xornalistas tras presidir en Segovia o acto de entrega das grandes cruces de Afonso X o Sabio.

O xefe do Executivo reiterou que o que escoitou ao próximo president non lle gusta, pero que o xulgará polos seus feitos. Nesa liña, sinalou que unha vez que conclúa o debate de investidura en Cataluña, o Goberno vai apostar polo "entendemento e pola concordia".

"Pero do mesmo xeito que digo isto, e dígoo porque o sinto, eu garanto que a lei, a Constitución española e o resto do ordenamento xurídico vanse cumprir. E creo que é bo -precisou- para que ninguén se chame a engano que faga esta afirmación".

Rajoy recoñeceu que o momento actual non é fácil e fixo unha apelación á mesura, á tranquilidade e "a deixar dun lado a ansiedade". "A ansiedade non conduce a nada, non resolve nada e non é o que nestes momentos deben ter as persoas para abordar unha situación tan complexa coma esta ,"engadiu nesa alusión á actitude de Ciudadanos ante a investidura de Torra.