O actor Willy Toledo, procesado e á espera de xuízo por cagarse en Deus e na Virxe María, cre que o caso do humorista Dani Mateo, imputado por soarse os mocos cunha bandeira de España durante un sketch televisivo, é máis grave para a liberdade de expresión que o seu caso.
"Detiveron a un actor por facer un personaxe. No meu caso fun eu, Guillermo Toledo, quen fixo unhas declaracións que a alguén lle pode parecer blasfemia, pero deter a actores no exercicio do seu oficio é demencial", sinalou en declaracións a Efe.
Toledo promociona estes días a película El Rei, dirixida por Alberto San e na que participa póndose na pel de varios personaxes, desde Salvador Puig Antich a Chicho Sánchez Ferlosio ou Juan Luís Cebrián.
A película é unha revisión crítica da Transición española a través da figura de Juan Carlos I e adapta a obra de teatro homónima que representaron no Teatro do Barrio o ano pasado.
En opinión de Toledo, a represión e a censura nunca desapareceron en España e pon como exemplo o caso de strong Albert Pla cuxa canción Carta al rey Melchor foi "censurada e prohibida nos medios durante o felipismo".
O actor considera que o seu é "un xuízo por blasfemia" aínda que coa reforma do Código Penal "agora chámano delito contra os sentimentos relixiosos, porque se ve que blasfemia non casaba con democracia".
Ao mesmo tempo lamentou, máis aló do xuízo, os problemas que ten para traballar debido ás súas opinións políticas.
