Facebook planea integrar WhatsApp, Instagram e Messenger
A idea é que o usuario siga tendo aplicacións distintas para cada un dos servizos, é dicir, cada unha co seu propio acceso no teléfono móbil ou o computador como ata agora, pero que unha vez dentro da aplicación, se poida interactuar con usuarios doutra plataforma
O xigante das redes sociais Facebook planea integrar os dous servizos de mensaxería da súa propiedade, WhatsApp e Messenger, así como a plataforma Instagram, co obxectivo de eliminar "barreiras" entre os seus produtos, segundo publicou este venres o diario The New York Times.
O rotativo neoiorquino citou a catro "persoas vinculadas a este proxecto" segundo as cales os empregados de Facebook deberán "reconfigurar o funcionamento de WhatsApp, Instagram e Messenger no seu nivel máis básico" con tal de poder combinar estas tres plataformas.
A idea é que o usuario siga tendo aplicacións distintas para cada un dos servizos, é dicir, cada unha co seu propio acceso no teléfono móbil ou o computador como ata agora, pero que unha vez dentro da aplicación, se poida interactuar con usuarios doutra plataforma.
Así, por exemplo, un usuario de WhatsApp podería enviar unha mensaxe a un de Instagram ou Messenger sen cambiar de aplicación e viceversa, ao ser unificada "a infraestrutura de mensaxería".
De acordo coa información publicada, Facebook aínda se atopa na "primeira fase" do proxecto, que espera completar en 2020.
