jueves. 02.12.2021 |
El tiempo
jueves. 02.12.2021
El tiempo

Alfonso Rueda anuncia 14 medidas contra a violencia de xénero

Alfonso Rueda. XOÁN REY
Alfonso Rueda, en el Congreso. XOÁN REY

Os obxectivos son unha mellor atención ás vítimas e previr a violencia machista

O vicepresidente da Xunta, Alfonso Rueda, anunciou este martes catorce novas medidas que o Goberno galego prevé aplicar para desenvolver o Pacto de Estado contra a violencia de xénero.

Rueda efectuou este anuncio durante a súa comparecencia deste martes ante o pleno do Parlamento de Galicia para informar as medidas previstas pola Xunta neste sentido e indicou que este novo paquete de actuacións complementa ás que se prevén pór en marcha antes de que finalice o ano.

Entre elas, están a colaboración co Colexio de Psicoloxía de Galicia para habilitar unha quenda de garda de atención especializada ás vítimas de violencia, a elaboración dun plan estratéxico de atención integral a menores e orfos, a implantación dun plan de incentivos a empresas e concellos para a contratación de vítimas e o fomento da súa inserción laboral ou a redacción dun plan de acompañamento e asesoramento para "evitar a segunda victimización" das denunciantes.

Mentres tanto, o paquete de medidas avanza polo vicepresidente da Xunta divídese en tres bloques, cuxos obxectivos van desde lograr a unha mellor atención ás vítimas a previr a violencia machista en todas as súas formas, xunto con ampliar o coñecemento da mesma.

"Saber que pasa para evitar que pase", resumiu Rueda en relación a este último bloque, que dispón actuacións tales como unha nova macroencuesta sobre a percepción da violencia machista que suceda á realizada en 2012 ou a elaboración dun estudo "en paralelo" sobre a incidencia deste problema no ámbito rural.

Así mesmo, no referente á atención das vítimas, apostou por seguir "mellorando as medidas para facilitarlle unha saída" a este "pesadelo" co reforzo das opcións habitacionais a través da rede galega de acollida ou mediante a ampliación da cobertura dos programas de atención terapéutica a aquelas persoas que sufran violencia sexual.

No relativo ao bloque de prevención, o membro do Goberno galego insistiu na importancia de incidir na formación tanto de mozas como de adultos e apelou á responsabilidade de centros educativos, universidades e medios de comunicación neste ámbito.

De igual forma, Rueda comprometeuse a traballar "moi estreitamente cos concellos en materia de prevención", aumentando as axudas aos mesmos, e ampliar a colaboración coas entidades da sociedade civil.

En definitiva, o vicepresidente autonómico sostivo que as catorce medidas previstas pola Xunta "engloban moitas das contidas" nun Pacto de Estado cuxas principais prerrogativas xa estaban implantadas en Galicia, posto que -asegurou- o 56 % do seu contido xa era de aplicación nesta autonomía.

"Isto non quere dicir que non haxa marxe de mellora", matizou Rueda, que valorou este acordo como unha proposta "aberta na que todos nos podemos sentir incluídos" e solicitou o "consenso" do resto de forzas para levalo a cabo.

Os grupos da oposición, con todo, non mostraron unha visión tan optimista da situación como a do vicepresidente e reclamaron un maior compromiso da Xunta nos labores contra a violencia machista.

Neste contexto, Paula Quinteiro, de En Marea, denunciou que o Executivo autonómico elude as súas responsabilidades á hora de dotar de recursos aos Centros de Información ás Mulleres (CIM), que "non teñen o persoal suficiente" e carecen de coordinación interinstitucional.

Pola súa banda, María Pierres, do PSdeG, tamén foi crítica á hora de avaliar o labor do Goberno galego na área contra a violencia, posto que lle reprochou a Rueda que os fondos para este fin aumenten "incluso por baixo do incremento xeneralizado dos orzamentos para este ano" e unicamente grazas ás transferencias estatais.

Do mesmo xeito, Noa Presas, do BNG, lamentou "a ausencia que tivo este tema nos dous debates máis recentes" do Lexislativo galego, o de orzamentos e o de política xeral, o que denota unha falta de interese da Xunta no mesmo; así como razoou que, se Galicia xa cumpría con boa parte do establecido no pacto estatal, debe ser máis ambiciosa e aplicar novas medidas.

Finalmente, Paula Prado, do PPdeG, eloxiou o labor do Goberno galego e a súa disposición a comparecer ante a Cámara, antes de criticar ao Executivo central pola decisión tomada na delegación do Goberno en Galicia de excluír "única e exclusivamente á Xunta" dunha mesa "para erradicar a violencia de xénero".

Alfonso Rueda anuncia 14 medidas contra a violencia de xénero
Comentarios